15 لاکھ پاکستانی بچے آن لائن جنسی ہراسانی کا شکار: یونیسف

کراچی (این این آئی) اقوام متحدہ کے ادارے برائے اطفال (یونیسف) کے مطابق پاکستان میں تقریباً 15 لاکھ بچوں کو ایک سال کے دوران انٹرنیٹ پر جنسی ہراسانی کا سامنا کرنا پڑا۔ متاثرہ بچوں میں سے 57 فیصد نے شرم، خاندانی ردعمل اور بدنامی کے خوف سے کسی کو اس بارے میں آگاہ نہیں کیا۔ یونیسف نے والدین کو بچوں کی ڈیجیٹل پلیٹ فارمز تک بلا روک ٹوک رسائی سے خبردار کرتے ہوئے ان کی آن لائن سرگرمیوں کی مؤثر نگرانی پر زور دیا ہے۔ ادارے نے مصنوعی ذہانت کے ذریعے بچوں کی جعلی تصاویر اور ویڈیوز تیار کرنے کو بھی ایک ابھرتا ہوا خطرہ قرار دیا ہے۔ رپورٹ کے مطابق آن لائن جنسی ہراسانی کے واقعات میں سماجی رابطوں کی ویب سائٹس کا حصہ 44 فیصد رہا جبکہ متاثرہ بچوں کے بیان کردہ 85 فیصد واقعات میں مبینہ ملزم ان کا جاننے والا شخص تھا۔ یونیسف نے بچوں کو نازیبا تصاویر اور پیغامات بھیجنے، ان کی نجی تصاویر طلب کرنے، تصاویر پھیلانے اور بلیک میل کرنے کو آن لائن جنسی ہراسانی کی اہم صورتیں قرار دیا ہے۔