فرید ایکسپریس میں حیدرآباد کی بکنگ والی بوگی غائب، مسافروں کو مشکلات

پنگریو (این این آئی) کراچی سے لاہور براستہ  پاکپتن چلنے والی فرید ایکسپریس میں حیدرآباد کی بکنگ والی بوگی کی عدم دستیابی معمول بن گئی، جس کے باعث مسافروں کو شدید مشکلات کا سامنا ہے۔ متاثرہ مسافروں نے وفاقی وزیر ریلوے اور پاکستان ریلوے کے اعلیٰ حکام سے صورت حال کا نوٹس لینے کا مطالبہ کیا ہے۔مسافروں کے مطابق ٹکٹ حاصل کرنے اور بکنگ کرانے کے باوجود مطلوبہ بوگی دستیاب نہیں ہوتی، جس سے سفر کے دوران پریشانی اٹھانا پڑتی ہے۔ گزشتہ روز بھی حیدرآباد کی بکنگ والی بوگی نہ ملنے کی شکایت سامنے آئی، جس کے باعث مسافروں کو خوار ہونا پڑا۔ متاثرہ افراد میں بیمار اور عمر رسیدہ مسافر بھی شامل تھے۔مسافروں کا کہنا ہے کہ فرید ایکسپریس کی کراچی سے لاہور جانے والی سروس کی آمد میں کئی کئی گھنٹے تاخیر بھی معمول بنتی جارہی ہے۔