بریسٹ کینسر کی بروقت تشخیص علاج ناگزیر ہے: بلاول بھٹو

کراچی(این این آئی)پاکستان پیپلز پارٹی کے چیئرمین بلاول بھٹو زرداری نے کہا ہے کہ خواتین کو چھاتی کے سرطان سے متعلق درست معلومات، بروقت تشخیص اور معیاری علاج کی سہولیات فراہم کرنا قومی ذمہ داری ہے۔ آگاہی مہمات اسی وقت مؤثر ثابت ہوں گی جب طبی معائنے اور علاج کی سہولیات خواتین کی دسترس میں ہوں۔میڈیا سیل بلاول ہاؤس سے جاری بیان کے مطابق، عالمی یومِ آگاہی برائے چھاتی کے سرطان کے موقع پر اپنے پیغام میں بلاول بھٹو زرداری نے کہا کہ خواتین کو بروقت طبی معائنے کی ترغیب دینے کے ساتھ یہ بھی بتایا جانا چاہیے کہ وہ معائنہ کہاں کروا سکتی ہیں اور علاج کے اخراجات کیسے برداشت کیے جاسکتے ہیں۔ ان کے بقول طبی مدد حاصل کرنے کا فیصلہ کرنے والی ہر خاتون کو قابلِ رسائی سہولت میسر ہونی چاہیے۔انہوں نے کہا کہ کسی خاتون کی بروقت تشخیص اور علاج کا انحصار اس کے رہائشی علاقے یا مالی وسائل پر نہیں ہونا چاہیے۔ دوردراز علاقوں اور کم آمدنی والے خاندانوں کی خواتین کی ضروریات کو طبی سہولیات کی منصوبہ بندی میں مرکزی اہمیت دی جائے۔بلاول بھٹو زرداری نے کہا کہ خواتین اکثر گھر اور خاندان کی ذمہ داریوں کے باعث اپنی صحت کو نظرانداز کردیتی ہیں۔ اہل خانہ کی ذمہ داری ہے کہ وہ خواتین کی صحت سے متعلق تشویش کو سنجیدگی سے لیں اور انہیں ڈاکٹر سے رجوع کرنے، ضروری معائنے کروانے اور علاج جاری رکھنے میں تعاون فراہم کریں۔انہوں نے خواتین پر زور دیا کہ وہ جسم میں کسی غیرمعمولی تبدیلی کو نظرانداز نہ کریں اور مستند ڈاکٹر سے مشورہ لینے میں تاخیر سے گریز کریں۔ انہوں نے کہا کہ بروقت تشخیص اور مناسب علاج سے صحت یابی کے امکانات بہتر ہوسکتے ہیں، اس لیے خوف یا غیرمصدقہ معلومات کی بنیاد پر طبی مشورہ مؤخر نہیں کرنا چاہیے۔چیئرمین پیپلز پارٹی نے متعلقہ اداروں پر زور دیا کہ آگاہی مہمات میں خواتین کو معائنے کی دستیاب سہولیات، مزید تشخیص اور علاج کے لیے متعلقہ مراکز کے بارے میں واضح رہنمائی فراہم کی جائے۔ انہوں نے کہا کہ لیڈی ہیلتھ ورکرز، طبی عملہ اور ذرائع ابلاغ اس حوالے سے اہم کردار ادا کرسکتے ہیں۔بلاول بھٹو زرداری نے چھاتی کے سرطان سے متاثرہ خواتین کے ساتھ یکجہتی کا اظہار کرتے ہوئے کہا کہ علاج کے ہر مرحلے میں ان کی عزتِ نفس، رازداری اور ضروریات کا خیال رکھا جانا چاہیے۔ ان کا کہنا تھا کہ کسی خاتون کا صحت سے متعلق سوال جھجک کے باعث دبنا نہیں چاہیے اور نہ ہی وسائل کی کمی علاج کی راہ میں رکاوٹ بننی چاہیے۔