اٹلی: طلباء کے احتجاجی جلوس میں شریک پاکستانی کی جیل یاترا

بیرگامو/اٹلی(بیورو رپورٹ)اٹلی کے شہر بیرگامو میں 17 اکتوبر کو طلبہ کے احتجاجی جلوس کے دوران ہونے والے ہنگاموں کے سلسلے میں عدالت نے دو گرفتار افراد کے خلاف اقدامات کی توثیق کر دی ہے، عدالتی ذراع کے مطابق 35 سالہ پاکستانی علی عدنان کو جیل میں رکھنے کا حکم دیا گیا ہے، جبکہ سینیگالی نژاد 19 سالہ نوجوان کو اس کے گھر میں ہی نظر بند رکھنے کا حکم دیا گیا ہے، پاکستانی شہری علی عدنان پر شہر کے علاقے پورتا نووا میں تھانے(کستورا) کی ایک اعلی خاتون پولیس افیسر، مارتا کاساتی کو دو میٹر سے زاد لمبی لوہے کی سلاخ سے دھمکانے کا الزام ہے، عدالت نے ملزم کے اس مؤقف سے اتفاق نہیں کیا کہ اس نے یہ سلاخ مظاہرین سے لے کر پولیس کے حوالے کرنے کے لیے اپنے قبضے میں لی تھی، بتایا جاتا ہے کہ بے گھر علی عدنان کے خلاف ماضی میں بھی پولیس ریکارڈ موجود ہے، دوسری جانب 19 سالہ سینیگالی نوجوان کو مبینہ طور پر نقاب نما ٹوپی اتارنے سے انکار کرنے، پولیس اہلکاروں کے خلاف مزاحمت کرنے اور ہجوم کو پولیس کی جانب اشیا پھینکنے پر اکسانے کے الزام میں گرفتار کیا گیا، واقعے کے دوران دو پولیس اہلکار زخمی بھی ہوئے، سینیگالی نوجوان کو پہلے جیل میں ہی رکھنے کا فیصلہ کیا گیا تھا، تاہم اس کی کم عمری کو مدنظر رکھتے ہوئے عدالت نے اسے گھر میں نظر بند رکھنے کا حکم دے دیا، یہ کارروائی بیرگامو میں طلبہ کے احتجاج کے دوران پیش آنے والے پرتشدد واقعات کی تحقیقات کا حصہ ہے، جن میں پولیس پر بوتلیں، شیشہ اور پتھر پھینکے جانے کی اطلاعات بھی سامنے آئی تھیں۔