پاکستان کی اہم ریٹنگز اب ”مستحکم آئوٹ لک”کیساتھ وسیع تر بی کیٹیگری میں واپس آچکی ہیں: مشیر وزیر خزانہ

اسلام آباد (این این آئی) وفاقی وزیر خزانہ کے مشیر خرم شہزاد نے کہا ہے کہ پاکستان کی اہم ریٹنگز اب مستحکم آئوٹ لک کے ساتھ وسیع تر بی کیٹیگری میں واپس آچکی ہیں، میکرو اکنامک استحکام کی بحالی کا وسیع تر مقصد ایسے حالات پیدا کرنا ہے جس میں کاروبار مزید سرمایہ کاری کر سکیں، برآمد کنندگان مقابلہ کر سکیں، گھرانے مالیات تک رسائی حاصل کر سکیں اور نجی سرمایہ پیداواری ترقی کو فنڈ دے سکے۔ گزشتہ روز شائع ہونے والے اپنے ایک آرٹیکل میں خرم شہزاد نے کہا کہ ورلڈ بیینک اور آئی ایم ایف کے بنکاک میں منعقدہ سالانہ اجلاس کے موقع پر فچ،موڈیز اور ایس اینڈ پی کے ساتھ ہماری بات چیت مختلف اہم امور پر مرکوز رہی ، انہوں نے کہا کہ بی بی کیٹیگری کی جانب اگلے قدم کے لیے پالیسی کے تسلسل، بیرونی بفرز، کم سود کے بوجھ اور ادارہ جاتی بہتری کی ضرورت ہوگی،یہی وجہ ہے کہ بنکاک میں ہماری بات چیت خودمختار فنانسنگ سے بالاتر تھی۔