دکان سے لاکھوں روپے مالیت کے لیپ ٹاپ لے جانیوالے شخص کیخلاف مقدمہ درج

لاہور (کرائم رپورٹر) ہال روڈ پر واقع ہیلو ٹریڈرز کی لیپ ٹاپ شاپ سے لاکھوں روپے مالیت کے لیپ ٹاپ مبینہ طور پر دھوکہ دہی سے لے جانے والے طاہر نامی شخص کے خلاف تھانہ گجر پورہ میں مقدمہ درج کرلیا گیا۔ ایف آئی آر کے مطابق شہزادہ محمد شاہد ولد محمد نواز مرحوم، جو ہیلو ٹریڈرز ہال روڈ لاہور میں ملازمت کرتا ہے، نے موقف اختیار کیا کہ طاہر نامی شخص لیپ ٹاپ خریدنے کے لیے دکان پر آیا اور 16 لاکھ 25 ہزار روپے مالیت کے لیپ ٹاپ حاصل کیے۔ ملزم نے دو لاکھ روپے میزان بینک میں آن لائن ٹرانسفر کیے، جبکہ باقی 14 لاکھ 25 ہزار روپے کی ادائیگی کے لیے یونیورسٹی آف انجینئرنگ اینڈ ٹیکنالوجی (UET) کے گیٹ نمبر3 کے سامنے جانے کا کہا۔ ایف آئی آر کے متن کے مطابق ملزم نے کہا کہ لیپ ٹاپ یونیورسٹی میں دینے ہیں، لہٰذا اس کے ساتھ چل کر سامان چیک کروا کر بقایا رقم وصول کرلی جائے۔ شہزادہ محمد شاہد اپنے ساتھی ورکر عبداللہ کے ہمراہ ملزم کی سیاہ ہونڈا سٹی گاڑی میں بیٹھ کر یو ای ٹی گیٹ نمبر3 پہنچا، جہاں ملزم نے اسے گاڑی سے اتر کر سامان دینے کا کہا۔ جیسے ہی وہ گاڑی سے نیچے اترا، ملزم مبینہ طور پر گاڑی سمیت سامان لے کر فرار ہوگیا۔ بعدازاں ملزم کا موبائل فون بھی بند ملا۔ ایف آئی آر کے مطابق متاثرہ شہری نے پولیس سے ملزم کو گرفتار کرکے سامان یا بقایا رقم واپس دلوانے کی استدعا کی۔ پولیس ریکارڈ کے مطابق ابتدائی طور پر تعزیراتِ پاکستان کی دفعہ 420 کے تحت مقدمہ درج کرکے مزید تفتیش کے لیے انوسٹی گیشن ونگ کو بھجوا دیا گیا۔