اسلام آباد مارچ کسی صورت ملتوی نہیں ہو گا نومبر میں کرینگے حافظ نعیم الرحمان

کراچی(نیوز ایجنسیاں )امیر جماعت اسلامی پاکستان حافظ نعیم الرحمان نے اعلان کیا ہے
کہ پٹرولیم لیوی کے خلاف اور عوامی حقوق کے حصول کیلئے جماعت اسلامی کا اسلام آباد مارچ کسی صورت ملتوی نہیں ہوگا، نومبر کے وسط میں لانگ مارچ کیا جائے گا۔ادارہ نور حق کراچی میں پریس کانفرنس کرتے ہوئے حافظ نعیم الرحمان نے پٹرولیم لیوی کی شدید مذمت کی اور وفاقی حکومت سے مطالبہ کیا کہ مارچ سے قبل لیوی ختم کرنے کے لیے شفاف اور واضح نظام وضع کیا جائے۔حافظ نعیم الرحمان نے کہا کہ جماعت اسلامی اسلام آباد مارچ کے فیصلے سے پیچھے نہیں ہٹے گی، پٹرولیم لیوی کا 70 فیصد سے زائد بوجھ غریب اور متوسط طبقے پر پڑ رہا ہے، جو اس مد میں حکومت کو 100ارب روپے سے زائد ادا کر رہا ہے۔انہوں نے حکومت کی ریلیف پالیسی پر تنقید کرتے ہوئے کہا کہ حکومت ہر ماہ عوام سے ڈیڑھ سو ارب روپے لیوی وصول کرتی ہے، جبکہ اس کے مقابلے میں صرف 32ارب روپے کا ریلیف دیا جاتا ہے۔امیر جماعت اسلامی کا کہنا تھا کہ جماعت اسلامی اس نامکمل ریلیف کو قبول نہیں کرے گی اور عوام کو ان کا مکمل حق ملنا چاہیے، بصورت دیگر حتمی فیصلہ اسلام آباد کی سڑکوں پر ہوگا۔حافظ نعیم الرحمان نے کہا کہ جماعت اسلامی کی جاری احتجاجی تحریک کے باعث حکومت کا ہاتھ کسی حد تک رکا ہے اور عوام کو کچھ نہ کچھ ریلیف مل سکا ہے۔ انہوں نے مزید کہا کہ فارم 47کی حکومت ہو یا 48کی، عوام کو ریلیف دینے کا اختیار حکومت کے پاس ہے اور جماعت اسلامی عوامی حقوق کے حصول کے لیے جدوجہد جاری رکھے گی۔حافظ نعیم الرحمان کا کہنا تھا کہ جماعت اسلامی کا کوئی ذاتی مفاد نہیں، وہ عوامی حقوق کی خاطر میدان میں موجود ہے اور اپنے مطالبات کی منظوری تک جدوجہد جاری رکھے گی۔
حافظ نعیم الرحمن