مناواں: گمشدہ بچے سے مبینہ جنسی زیادتی کرنیوالا ملزم گرفتار

لاہور (کرائم رپورٹر) مناواں پولیس نے گمشدہ بچے سے مبینہ جنسی زیادتی کرنے والے ملزم کو گرفتار کر لیا۔ تفصیلات کے مطابق والد نے بیٹے کی گمشدگی کی رپورٹ تھانہ مناواں میں درج کروائی۔ پولیس کو تلاش کے دوران اورنج لائن سٹیشن کے قریب گمشدہ بچے کا سراغ مل گیا۔ بچے سے دریافت کرنے پر مبینہ جنسی زیادتی اور تشدد کا افسوسناک انکشاف ہوا۔ پولیس نے بچے کی نشاندہی پر ملزم کی گرفتاری کے لیے چھاپہ مارا تو پولیس کو دیکھتے ہی ملزم نے فرار اور گرفتاری سے بچنے کے لیے مزاحمت کی۔ مزاحمت کے باوجود ملزم علی رضا کو کپ سٹور سے گرفتارکر لیا گیا۔ ابتدائی تفتیش میں ملزم کا سابقہ مجرمانہ ریکارڈ بھی سامنے آگیا۔ گرفتار ملزم زیادتی، چوری اور ڈکیتی سمیت متعدد مقدمات میں ریکارڈ یافتہ نکلا۔ ڈی آئی جی آپریشنز فیصل کامران کا اس موقع پر کہنا تھا کہ بچوں کے خلاف جرائم میں ملوث عناصر کسی رعایت کے مستحق نہیں۔ گمشدگی کی اطلاع پر فوری ردعمل اور بچے کی بحفاظت تلاش پولیس کی اولین ترجیح ہے۔ بچوں کو نشانہ بنانے والے عناصر کے خلاف زیرو ٹالرنس پالیسی کے تحت کارروائیاں جاری رہیں گی۔