اٹک (نامہ نگار) ڈسٹرکٹ پولیس آفیسر اٹک کیپٹن )ر)علی بن طارق نے کہا ہے کہ صحافت ریاست کا چوتھا ستون ہے، مثبت اور تعمیری صحافت نہ صرف اداروں کی اصلاح میں معاون ثابت ہوتی ہے بلکہ معاشرے میں بہتری لانے کا بھی ذریعہ بنتی ہے، صحافیوں کو چاہیے کہ وہ ذاتی پسند و ناپسند سے بالاتر ہو کر اپنی پیشہ ورانہ ذمہ داریاں ادا کریں اور تنقید برائے اصلاح کو اپنا صحافتی اصول بنائیں، ان خیالات کا اظہار انہوں نے اپنے دفتر میں صحافیوں سے ملاقات کے دوران گفتگو کرتے ہوئے کیا، اس موقع پر چیف سیکیورٹی آفیسر ملک محمد نعیم اورپبلک ریلیشن آفیسر وقار الحق بھی موجود تھے، ڈی پی او علی بن طارق نے کہا کہ پولیس اور صحافیوں کا بنیادی مقصد معاشرے سے جرائم کا خاتمہ اور عوام کے تحفظ کو یقینی بنانا ہے، دونوں شعبے اپنی اپنی ذمہ داریوں کے دائرے میں رہتے ہوئے جرائم پیشہ عناصر کے خلاف مو ثر کردار ادا کر سکتے ہیں، صحافیوں کی مثبت نشاندہی سے پولیس کو اپنی کارکردگی بہتر بنانے اور خامیوں کی اصلاح کا موقع ملتا ہے، انہوں نے واضح کیا کہ اٹک پولیس میں کالی بھیڑوں اور محکمہ کی بدنامی کا سبب بننے والے افسران و اہلکاروں کی کوئی گنجائش نہیں، اگر کوئی افسر یا ملازم کسی ناجائز یا غیر قانونی سرگرمی میں ملوث پایا گیا تو اس کے خلاف کسی قسم کی رعایت نہیں برتی جائے گی، ڈی پی او نے بتایا کہ اٹک پولیس کے افسران اور جوانوں کی مسلسل محنت، پیشہ ورانہ لگن اور ذمہ داریوں سے وابستگی کے باعث ضلع میں جرائم کی شرح میں 30 فیصد سے زائد کمی ریکارڈ کی گئی ہے، جو حوصلہ افزا پیش رفت ہے، انہوں نے کہا کہ جرائم پر قابو پانا اور شہریوں کی جان و مال کا تحفظ پولیس کی بنیادی ذمہ داری ہے، وزیراعلی پنجاب مریم نواز شریف کے دورہ اٹک کے حوالے سے انہوں نے کہا کہ اللہ تعالی کے فضل و کرم سے اٹک پولیس نے بہترین سکیورٹی انتظامات کیے اور صوبے کی سربراہ کو فول پروف سکیورٹی فراہم کرنے کی ذمہ داری احسن انداز میں نبھائی، ملاقات میں اس عزم کا اظہار کیا گیا کہ پولیس اور صحافتی حلقوں کے درمیان مثبت رابطوں، ذمہ دارانہ تنقید اور باہمی تعاون کو فروغ دے کر عوامی مسائل کے حل اور جرائم کے خاتمے کے لیے مشترکہ کردار ادا کیا جائے گا۔
