ازبکستان کی پاکستان کو بیجوں، باغبانی’ لائیوسٹاک شعبوں میںتعاون کی پیشکش

اسلام آباد (این این آئی)ازبکستان نے پاکستان کو بیجوں، باغبانی اور لائیوسٹاک کے شعبوں میں تکنیکی تعاون کی پیشکش کی ہے ۔تفصیلات کے مطابق پاکستان اور ازبکستان نے زرعی تحقیق، بیجوں کی تیاری، باغبانی اور لائیوسٹاک کے شعبوں میں دوطرفہ تعاون کو وسعت دینے کے امکانات پر تبادلہ خیال کیا ہے جس کا مقصد جدید ٹیکنالوجی اور موسمیاتی تبدیلیوں سے مطابقت رکھنے والے زرعی طریقوں کو فروغ دینا ہے اس سلسلے میں گفتگو 31ویں عالمی ماحولیاتی کانفرنس (کوپ 31) کے موقع پر انطالیہ، ترکیہ میں وفاقی وزیر برائے قومی غذائی تحفظ و تحقیق رانا تنویر حسین اور ازبکستان کے نائب وزیر زراعت علی شیر شکوروف کے درمیان ملاقات میں ہوئی۔ملاقات کے دوران بالخصوص کپاس اور باغبانی کی فصلوں کے لیے ہائبرڈ اور جینیاتی طور پر تبدیل شدہ (جی ایم او) بیجوں کی تیاری میں مشترکہ تحقیق کے امکانات پر تبادلہ خیال کیا گیا۔ اس کے علاوہ لائیوسٹاک کے شعبے میں تکنیکی تعاون، سائنسی مہارتوں سے استفادے، تحقیقی تجربات کے تبادلے اور جدید زرعی حل کے ذریعے پیداوار میں اضافے اور غذائی تحفظ کو مضبوط بنانے پر بھی بات چیت ہوئی۔وفاقی وزیر رانا تنویر حسین نے پاکستان میں ازبکستان کا تکنیکی ماہرین پر مشتمل وفد بھیجنے کی تجویز کا خیرمقدم کیا اور دونوں ممالک کے زرعی ماہرین اور متعلقہ تحقیقی اداروں کے درمیان براہِ راست روابط کے فروغ میں دلچسپی کا اظہار کیا۔ مجوزہ دورے سے مشترکہ تحقیق، ٹیکنالوجی کی منتقلی اور ادارہ جاتی تعاون کے عملی امکانات کا جائزہ لینے میں مدد ملے گی۔یہ بات چیت کوپ 31 کے موقع پر ازبکستان کے موسمیاتی تبدیلیوں سے ہم آہنگ زرعی و غذائی نظام میں سرمایہ کاری کے اقدامات کے تناظر میں بھی اہمیت کی حامل ہے۔