نہ دیکھا کریں، ٹک ٹاکرز کی نازیبا ویڈیوز پر سوال، محسن نقوی کے جواب پر ہال قہقہوں سے گونج اٹھا

لاہور (آئی این پی) وفاقی وزیر داخلہ محسن نقوی سے سوشل میڈیا پر ٹک ٹاکرز کی جانب سے نازیبا اور غیر اخلاقی مواد شیئر کرنے سے متعلق سوال کیا گیا تو ان کےمختصر جواب نے وہاں موجود صحافیوں کو ہنسنے پر مجبور کر دیا۔ وفاقی وزیر داخلہ محسن نقوی نے نیشنل سائبر کرائم انوسٹی گیشن ایجنسی (این سی سی آئی اے) کے لاہور زونل دفتر کا دورہ کیا، جہاں انہوں نے میڈیا سے گفتگو کرتے ہوئے سائبر کرائم، آن لائن ہراسانی، بلیک میلنگ اور سوشل میڈیا پر نامناسب مواد کی تشہیر سمیت مختلف امور پر بات کی۔ اس موقع پر ایک صحافی نے وزیر داخلہ سے سوال کیا کہ سوشل میڈیا پر متعدد ٹک ٹاکرز مختلف اکائونٹس کے ذریعے بیہودہ اور نازیبا مواد شیئر کر رہے ہیں، جسے لاکھوں لوگ دیکھتے ہیں۔ ایسے مواد کی روک تھام کے لیے کیا اقدامات کیے جارہے ہیں؟ صحافی کے سوال پر محسن نقوی نے مختصر جواب دیتے ہوئے کہا کہ نہ دیکھا کریں۔ وزیر داخلہ کا یہ جواب سنتے ہی وہاں موجود افراد ہنس پڑے اور پورا ہال قہقہوں سے گونج اٹھا۔