سعودی عرب اور چین کے درمیان اعلیٰ سطح کی سفارتی ملاقات، حوثی حملوں اور علاقائی سلامتی پر تبادلہ خیال

ریاض (این این آئی) سعودی وزیرِ خارجہ شہزادہ فیصل بن فرحان اور مشرقِ وسطی کے امور کے لیے چین کے خصوصی ایلچی ژائی جون کے درمیان ریاض میں ایک اہم ملاقات ہوئی جس میں خطے کی تازہ ترین سکیورٹی صورتحال اور مملکت کے خلاف حوثی ملیشیا کے جاری حملوں پر تفصیلی تبادلہ خیال کیا گیا۔ سعودی سرکاری میڈیا کے مطابق ملاقات میں دونوں رہنمائوں نے علاقائی امن و استحکام کو درپیش خطرات اور کشیدگی میں کمی لانے کی سفارتی کوششوں کا جائزہ لیا۔ اس موقع پر دونوں شخصیات نے کہا کہ عالمی تجارت اور سپلائی چین کی روانی برقرار رکھنے کے لیے آبنائے ہرمز اور آبنائے باب المندب جیسی اہم ترین بحری گزرگاہوں کی حفاظت اور جہاز رانی کی آزادی کو ہر قیمت پر یقینی بنانا ناگزیر ہے۔ سفارتی مبصرین نے کہا کہ چین کی جانب سے مشرقِ وسطی میں کشیدگی کم کرنے کے لیے بڑھتی ہوئی سفارتی سرگرمیاں خطے میں توانائی کی منڈیوں کے استحکام کے لیے نہایت اہم ہیں۔