نواز شریف کی گرفتاری کا حکم آیا تو عمل کرینگے

اسلام آباد (مانیٹرنگ ڈیسک) وزیراعظم شاہد خاقان عباسی نے کہا ہے کہ سیاست میں تبدیلی عوام سے آتی ہے عدالتوں سے نہیں۔ 63,62 دو تہائی نہیں اتفاق رائے سے تبدیل کرینگے۔ اسحاق ڈار کو مستعفی ہونے کا نہیں کہوں گا وہ لڑیں گے۔ اگلا الیکشن نواز شریف کے نام کا ہوگا۔ نجی ٹی وی پروگرام میں گفتگو کرتے ہوئے انہوں نے کہا کہ سابق وزیراعظم کی گرفتاری کا حکم آتا ہے تو عمل کرینگے۔ نواز شریف اور دوسروں کےلئے پیمانہ ایک ہونا چاہیے۔ انہوں نے مزید کہا کہ مریم نواز نے انتخابی مہم بڑے اچھے طریقے سے چلائی۔ ووٹ کی توہین کی بات ان کی تقریر کا ایک پہلو ہے۔ جلسے، انٹرویو اور پارلیمان میں تقریر کا انداز الگ ہوتا ہے۔ انہوں نے کہا کہ صدر ٹرمپ سے ملاقات طے نہیں۔ امریکی پالیسی پر جواب کو سب نے سراہا۔ بھارت کے ساتھ بریک تھرو کا امکان نہیں تاہم کشیدگی بڑھے گی۔ انہوں نے مزید کہا کہ پارٹی فیصلہ کرے تو وہ سب کی رائے ہوتی ہے۔ فواد حسن فواد رائے ونڈ کا فیصلہ میرے پاس لیکر نہیں آئے۔ چودھری نثار سے کہوں گا کہ پارٹی فیصلے کا احترام کریں۔ کوئی بھی معاملات کا حل لیکر آئے معاون بنا دونگا، نومبر کے بعد لوڈشیڈنگ نہیں ہوگی۔