آسٹریلیا میں ایشز سیریز کھیلنے سے بڑھ کر کچھ نہیں

لندن (بی این پی ) سٹار انگلش فاسٹ باﺅلر جیمز اینڈرسن نے کہا ہے کہ آسٹریلیا کے خلاف اس کی سرزمین پر ایشز سیریز کھیلنے سے بڑھ کر کچھ نہیں، کوشش ہو گی کہ عمدہ کارکردگی کا مظاہرہ کر کے ٹیم کو فتوحات دلانے میں کردار ادا کروں۔ اینڈرسن کو انگلینڈ کی طرف سے زیادہ ٹیسٹ وکٹیں لینے کا اعزاز حاصل ہے۔ انہوں نے 500 سے زائد وکٹیں لے رکھی ہیں۔ اپنے ایک انٹرویو میں انہوں نے کہا کہ کینگروز کے خلاف ایشز سیریز کھیلنا پسند کرتا ہوں تاہم اس کے خلاف اس کی سرزمین پر کھیلنے کا مزہ ہی کچھ اور ہے، بطور سینئر باﺅلر میری ہمیشہ کوشش ہوتی ہے کہ عمدہ کارکردگی کا مظاہرہ ٹیم کی کامیابی میں کلیدی کردار ادا کروں اور اس بار بھی میرا ہدف یہی ہو گا، انہوں نے کہا کہ نوجوان کھلاڑیوں کو میرا مشورہ ہے کہ وہ اس دورے سے لطف اندوز ہوں، انہیں چاہیے کہ وہ کسی طرح کا دباﺅ نہ لیں، اگر کھلاڑی اعصاب کو قابو میں رکھ کر کھیلے تو کینگروز کیلئے ہماری ٹیم کو ایشز سیریز ٹائٹل کے دفاع سے روکنا بہت مشکل ہو گا۔