دبئی: ڈے اینڈ نائٹ ٹیسٹ میچ میں سری لنکا کے 317 رنز کے ہدف کے تعاقب میں پاکستان کی بیٹنگ لائن مشکلات کا شکار ہے اور اس کے 5 کھلاڑی آؤٹ ہوچکے ہیں۔پاکستان اورسری لنکا کے درمیان جاری دوسرے ٹیسٹ میچ میں 317 رنز کے ہدف کے تعاقب میں اننگز کا آغازشان مسعود اور سمیع اسلم نے کیا تو سمیع اسلم صرف ایک رنز بنا کر گماگے کا شکار ہوگئے، سینیئربلے بازاظہرعلی بھی زیادہ دیرتک وکٹ پرنہ ٹہرسکے اور36 کے مجموعی اسکور پر 17 رنز بنا کر پردیپ کی گیند پر کیچ آؤٹ ہوگئے، ان کے بعد آنے والے حارث سہیل بھی زیادہ دیر وکٹ پر نہ ٹک سکے اور صرف 10 رنز بنا کر پریرا کا شکار ہوگئے۔52 کے مجموعی اسکور پر شان مسعود بھی ہمت ہار بیٹھے اور 21 رنز بنا کر پویلین لوٹ گئے انہیں بھی پریرا نے آؤٹ کیا، ان کے بعد آنے والے بابر اعظم بھی اسی اوور میں 2 گیندیں کھیل کر بنا کوئی رن بنائے چلتے بنے، اس وقت وکٹ پر کپتان سرفراز احمد اوراسد شفیق موجود ہیں۔اپنی دوسری اننگز میں سری لنکا کی پوری ٹیم 96 رنز بنا کر آؤٹ ہوگئی تھی جس پرقومی ٹیم کو 317 رنز کا مشکل ہدف ملا ہے۔ سری لنکا کی جانب سے مینڈس نے سب سے زیادہ 29 اور ڈکویلا نے 21 رنز بنائے جب کہ ان کے علاوہ کوئی بھی مہمان بلے باز خاطرخواہ کارکردگی نہیں دکھا سکا ۔پاکستان کی جانب سے دوسری اننگز میں وہاب ریاض نے 4، حارث سہیل نے 3 ،یاسر شاہ نے 2 اورمحمد عباس نے ایک وکٹ حاصل کی۔اس سے قبل اپنی پہلی اننگز میں سری لنکا نے 482 رنز بنائے تھے جس کے جواب میں پاکستانی ٹیم 262 رنز بنا کر آؤٹ ہو گئی اور یوں مہمان ٹیم کو پہلی اننگز میں 220 رنز کی سبقت حاصل ہوئی تھی۔
واضح رہے کہ ابو ظہبی میں کھیلے گئے ٹیسٹ سیریز کے پہلے میچ میں سری لنکا نے پاکستان کو 21 رنز سے شکست دی تھی۔
