لاہور (خبرنگار) عرس حضرت داتا گنج بخش کی تین روزہ تقریبات گذشتہ رات اڑھائی بجے ملکی سلامتی اور مسلم امہ کی کامیابی کی رقعت انگیز دعاﺅں کیساتھ اختتام پزیر ہوگئیں ، تین روز جاری رہنے والے عرس کی تقریبات میں شرکت کیلئے ناصرف اندرون ملک بلکہ بیرون ملک سے بھی عقیدت مندوں نے کثیر تعداد میںشرکت کی، ۔ عرس کے تینوں روز لاکھوں زائرین اور عقیدت مندوں نے مزار پر حاضری دیکر فاتحہ خوانی کی،ملک بھر سے عقیدت مند ڈھول کی تھاپ کیساتھ مزار پر خوبصورت تیار کردہ چادریں چڑھانے کیلئے آتے رہے، تہہ خانے میں بنے سماع ہال میں تینوںروز ملک کے نامور قوالوںنے اپنا کلام پیش کیا، نعت خوانوں نے بھی خدمت رسالت میںگلہائے عقیدت پیش کئے، مسجد داتا دربار میں علماءکرام اور قراءحضرات نے بھی تینوںدن زائرین کو مسحور کئے رکھا۔ عرس کے سلسلے میں محکمہ اوقاف کی جانب سے کثیر انتظام کے علاوہ بھی زائرین اور عقیدت مندوںکی جانب سے انواع و اقسام کے کھانے بطور لنگر و نیاز تقسیم کئے جاتے رہے، مختلف بزرگان دین کے آستانوںسے وابستہ شخصیات نے بھی عرس کے موقع پر تینوں روز قیام کیا اور مزار پر حاضری دیتے رہے، پولیس، واپڈا، واسا، سوئی گیس، ریسکیو، میڈیکل اوردیگر ادارے چوبیس گھنٹے ڈسپلن کیلئے ڈیوٹی پر موجود رہے ، زائرین کومتعدد مقامات پر چیکنگ کے بعد قطار کی شکل میں مزار میں جانے کا راستہ دیاگیا اسی طرح خارجی راستے بھی منظم رہنے کیلئے بنائے گئے تھے، خواتین اورمردوںکیلئے تینوںروز چوبیس گھنٹے علیحدہ علیحدہ انتظامات کئے گئے۔ زائرین کی کثیر تعداد کے باعث مزار سے دور مختلف عمارتوںاوراحاطوںمیں پارکنگ سٹینڈ بنائے گئے جہاں سے عقیدت مند پیدل مزار پر پہنچتے، دودھ کی سبیل کے افتتاح کے بعد تینوں دن چوبیس گھنٹے مردو خواتین زائرین قطاروں میں سبیل سے دودھ لیتے رہے۔صوبائی وزیر اوقاف سید زعیم حسین قادری، ڈائریکٹر جنرل اوقاف و مذہبی امورڈاکٹر طاہر رضا بخاری ، ایڈمنسٹریٹرڈاکٹر نور محمداعوان اختتامی دعا میں شرکت کی اختتامی دعا کے وقت رقعت امیز مناظر دیکھنے کو ملے زائرین نے رو رو کر ملک کی سلامتی کےلئے دعائیں مانگیں ۔ مزاراور مسجد حضرت داتا گنج بخش کو خوبصورت روشنیوںسے سجایا گیاتھا، عرس کے اختتام کے باوجودزائرین کی جانب سے مزار پر حاضری اور نذر و نیاز کی تقسیم کا سلسلہ آئندہ کئی روز تک جاری رہے گا۔
داتا گنج بخش عرس تقریبات ختم ،لاکھوں زایئرین کی حاضری
