لاہور (کرائم رپورٹر) شمالی چھاﺅنی کے علاقہ میں تیزرفتار کار نے حساس ادارے کے ملازم کو ٹکر مار کر ہلاک کر دیا جبکہ کاہنہ میں بہنوں کے سامنے ڈاکوﺅں نے مزاحمت کرنے پر بھائی کو گولی مار دی جسے طبی امداد کیلئے ہسپتال پہنچا دیا گیا۔ بتایا گیا ہے کہ شمالی چھاﺅنی کے علاقہ رنگ روڈ ڈیڑھ پنڈی سٹاپ کے قریب حساس ادارے کا ملازم سیف اللہ سڑک عبور کر رہا تھا کہ اس دوران تیزرفتار نامعلوم گاڑی نے ٹکر مار کر شدید زخمی کر دیا جسے فوری طبی امداد کیلئے ہسپتال لے جایا گیا مگر وہ جانبر نہ ہو سکا۔ پولیس کے مطابق متوفی حافظ آباد کا رہائشی تھا اور لاہور میں ڈیوٹی کے فرائض انجام دے رہا تھا تاہم گاڑی کی تلاش کیلئے سی سی ٹی وی کیمروں سے مدد لی جا رہی ہے جبکہ کاہنہ کے علاقہ میں دیپالپور کا رہائشی ظائفے نامی نوجوان اپنی بہنوں کو ہاسٹل سے لے کر واپس جا رہا تھا کہ کاہنہ کاچھا کے قریب ڈاکوﺅں نے موبائل فون اور 14ہزار کی نقدی چھین لی۔ اس دوران مذکورہ جوان نے مزاحمت کی تو ایک ڈاکو نے گولی مار دی اور موقع سے فرار ہو گئے۔ زخمی کو فوری طبی امداد کیلئے ہسپتال لے جایا گیا جہاں پر اسے طبی امداد دی جا رہی ہے۔
