راولپنڈی: (ویب ڈیسک) ڈی جی آئی ایس پی آر میجر جنرل آصف غفور نے کہا ہے کہ بھارتی سفارتکاروں کو ایل او سی پر جانے کی جرات نہیں ہوئی، بھارتی ہائی کمیشن اپنے آرمی چیف کے دعوے پر کھڑا نہ رہ سکا، غیر ملکی سفارتکار، میڈیا گروپ ایل او سی پر سچ سامنے ائیں گے۔ادھر پاکستان میں متعین سفارتکاروں کی ٹیم ایل او سی پہنچ گئی۔ ترجمان دفتر خارجہ نے کہا بھارتی ہائی کمیشن سے کوئی اہلکار ایل او سی جانے کیلئے نہیں پہنچا، بھارت کی جانب سے مبینہ لانج پیڈز کا محل وقوع بھی فراہم نہیں کیا گیا، رات بھر بھارتی ہائی کمیشن کے جواب کے منتظر رہے۔ ترجمان دفتر خارجہ کی بار بار پیشکش پر بھی بھارتی سفارتی عملہ خاموش رہا۔

اسلام آباد(ویب ڈیسک): جمیعت علمائے اسلام کے آزادی مارچ سے متعلق سوچ بچار کیلئےحزب اختلاف کی کل جماعتی کانفرنس(اے پی سی) آج ہوگی جس میں اہم رہنما شریک ہوں گے۔ذرائع کا کہنا ہے کہ آج کی کانفرنس میں آزادی مارچ کے حوالے سے اہم فیصلے کیے جائیں گے۔خیال رہے کہ مولانا فضل الرحمان نے حکومت مخالف مارچ کا اعلان کر رکھا ہے جب کہ ن لیگ اور پیپلزپارٹی سمیت دیگر جماعتوں نے انہیں مکمل تعاون کی یقین دہانی کرائی ہے۔جمیت علمائے اسلام کی رہبر کمیٹی نے حکومت کی مذاکراتی ٹیم کیساتھ بات کرنے سے انکار کر دیا ہے۔ جے یو آئی کے رہنما مولانا غفور حیدری کہہ چکے ہیں کہ مارچ ہر صورت میں ہو کر رہے گا اور ہمارے جیالے ہر صورت آئیں گے۔

اسلام آباد(ویب ڈیسک): احتساب عدالت نے سابق صدر آصف علی زرداری اور فریال تالپور کے جوڈیشل ریمانڈ میں 12 نومبر تک توسیع کردی ہے۔جج محمد بشیر نے جعلی اکاونٹ کیس کی سماعت کی جس میں پاکستان پیپلزپارٹی کے دونوں رہنماوں کو عدالت میں پیش کیا گیا تھا۔آصف زرداری کی جیل میں سہولیات فراہمی سے متعلق درخواست پر بھی سماعت ہوئی جس پر فیصلہ محفوظ کر لیا گیا ہے۔سابق صدر کے وکیل لطیف کھوسہ نے استدعا کی ان کے موکل کو جیل میں ذاتی مشقتی فراہم کیا جائے۔وکیل صفائی نے عدالت کوبتایا کہ میڈیکل بورڈ کی رپورٹ کے باوجود زردرای کو اسپتال منتقل نہیں کیا گیا، جیل حکام سے آج پوچھا جائے کیوں عمل نہیں کیا جا رہا۔

لاہور: (ویب ڈیسک) نواز شریف کی طبیعت کی نازسازی پر لیگی کارکنوں نے سروسز ہسپتال کے باہر احتجاج کیا، ملتان روڈ پر نیب دفتر کے باہر اور جیل روڈ پر بھی مظاہرہ کیا۔ادھر نواز شریف کی طبیعت سے متعلق مریم اورنگزیب کا کہنا ہے کہ خون میں سفید خلیوں کی تعداد میں نمایاں کمی انتہائی خطرناک علامت ہے، اسے نظرانداز کرنا جان لیوا بھی ہوسکتا ہے، کیسی ظالم اور بے حس حکومت ہے جو سیاسی مخالفین کو علاج، خوراک اور دوا سے محروم کرتی ہے۔مریم اورنگزیب نے کہا ذاتی معالج نے سرکاری رپورٹس دیکھ کر خبردار کیا ہے کہ نوازشریف کی جان کو سخت خطرہ ہے، سرکاری طبی رپورٹس میں ان طبی خطرات کی نشاندہی کی گئی ہے۔مسلم لیگ نون کے رہنما احسن اقبال نے کہا اگر نواز شریف کو کچھ ہوا تو جو جو اس کھیل کا حصہ ہے سب کو جوابدہ ہونا پڑے گا۔