اسلام آباد (مانیٹرنگ ڈیسک) پرویزمشرف آل پاکستان مسلم لیگ کی صدارت سے مستعفی ہوگئے ہیں۔ ترجمان آل پاکستان مسلم لیگ نے بتایا ہے کہ پرویزمشرف آل پاکستان مسلم لیگ کی صدارت سے مستعفی ہوگئے ہیں۔ پرویزمشرف نے اپنا استعفی الیکشن کمیشن کوبجھوا دیا ہے۔ اس استعفی کی وجہ ان کےخلاف لاہور ہائی کورٹ میں دائر درخواست بنی ہے۔ درخواست میں کہا گیاکہ پرویز مشرف نااہل ہونے کی وجہ پارٹی کی قیادت نہیں کرسکتے۔ پرویزمشرف کی نااہلی پارٹی رجسٹریشن میں رکاوٹ بن رہی تھی۔ ریٹرننگ افسرکی جانب سے نااہل قرار پانے پرپرویزمشرف نے عہدہ چھوڑا تاہم پرویز مشرف پارٹی کے سرپرست رہیں گے۔ آل پاکستان مسلم لیگ کی صدارت اب ڈاکٹر امجد کے سپرد کردی گئی ہے جو پہلے پارٹی کے سیکریٹری جنرل تھے۔مہرین آدم آل پاکستان مسلم لیگ کی سیکرٹری جنرل ہوںگی۔اے پی ایم ایل کی الیکشن کمیشن میں رجسٹریشن کیلئے نئی درخواست بھی دائر کردی گئی ہے۔ درخواست کامتن ہے کہ پارٹی رجسٹریشن میں ڈاکٹرامجدکوسربراہ مقررکیاجائے۔آل پاکستان مسلم لیگ کا قیام 2010 ءمیں آیاتھا۔ اس پارٹی کی لانچگ لندن میں کی گئی تھی۔ پارٹی کا سینٹرل سیکرٹریٹ اسلام آباد میں واقع ہے۔ پارٹی کے کوآرڈینیٹراحمد رضاخان قصوری ہیں۔ آل پاکستان مسلم لیگ کی سینیٹ میں کوئی نمائندگی نہیں ہے تاہم گذشتہ قومی اسمبلی میں اس پارٹی کے پاس صرف ایک سیٹ تھی۔ صوبائی اسمبلی میں بھی چترال سے اس پارٹی کے پاس ایک سیٹ تھی۔سابق صدر پرویز مشرف کے اثاثے بھی سامنے آگئے۔اس سے قبل سابق صدر پرویز مشرف کے اثاثوں کی تفصیلات بھی سامنے آگئی تھیں۔ الیکشن کمیشن میں جمع کرائی گئی تفصیلات کے مطابق پرویز مشرف کی پاکستان میں تمام جائیداد اہلیہ کے نام پر ہیں تاہم پرویز مشرف کے مجموعی اثاثے 3 کروڑ 43 لاکھ روپے ظاہر کئے گئے۔پرویز مشرف کی پاکستان میں چک شہزاد فارم کی قیمت 2 کروڑ 37 لاکھ روپے ظاہرکی گئی ہے ، ڈی ایچ اے کراچی میں مکان کی قیمت 50 لاکھ روپے اور ڈان ٹان دبئی میں اپارٹمنٹ کی قیمت 9 کروڑ روپے ظاہرکی گئی۔دستاویز کے مطابق اندرون و بیرون ملک 2 کروڑ 60 لاکھ کی گاڑیاں رکھی ہوئی ہیں ساتھ ہی مختلف بینک اکانٹس میں 2 کروڑ12 لاکھ روپے بھی موجود ہیں۔واضح رہے کہ پرویز مشرف نااہلی کیس میں سپریم کورٹ نے بڑا حکم دیتے ہوئے کاغذات نامزدگی جمع کرانے کی مشروط اجازت دے دی تھی تاہم وطن واپس نہ آنے پر عدالت نے سابق صدر کے کاغذات نامزدگی جمع کرانے کا حکم واپس لےلیا تھا۔گزشتہ روزسابق صدر پرویزمشرف کے این اے 1 چترال سے کاغذات نامزدگی مسترد کردیئے گئے جہاں ریٹرننگ افسرمحمد خان نے ان کے کاغذات مسترد کیے۔اس کے علاوہ کراچی کے حلقہ این اے 247 سے سابق صدر پرویز مشرف کے کاغذات نامزدگی خود واپس لے لیے گئے۔اس سے قبل نوازشریف بھی سپریم کورٹ کی جانب سے نااہلی پر مسلم لیگ نون کی قیادت سے دستبردار ہوچکے ہیں۔

لاہور (نمائندہ خصوصی) پیپلز پارٹی کے چیئرمین بلاول بھٹو زرداری کی کزن اور صنم بھٹو کی بیٹی آزادے حسین کی شادی لندن میں ایک غیر مسلم گورے کے ساتھ ایک پرائیویٹ ہال میں سرانجام پائی جس میں بلاول بھٹو زرداری، آصفہ زرداری اور بختاور زرداری نے بھی شرکت کی محترمہ بینظیر بھٹو کی بھانجی آزادے حسین ہالی وڈ کی فلم انڈسٹری کی کئی فلموں میں مرکزی کردار ادا کر چکی ہیں جن میں اوفینڈرز، کریسٹی اور آنے والی رشین فلم رینے وسکایا شامل ہیں متذکرہ دونوں فلموں کو عالمی شہرت یافتہ فلمیں قرار دیا جا رہا ہے۔ شادی کی اس تقریب میں بڑی تعداد میں مہمانوں نے شرکت کی۔ اس دوران پاکستان کے حالات پر بحث مباحثہ ہوتا رہا جبکہ دولہا اور دلہن بھی مہمانوں میں گھل مل گئے اور ان کے ساتھ گپ شپ کرتے رہیں۔ دونوں کی مسکراہٹوں اور قہقہوں سے لگتا تھا کہ انہیں اپنی اپنی پسند مل گئی ہے۔

لاہور (مانیٹرنگ ڈیسک) نگران وفاقی وزیراطلاعات علی ظفر نے کہا ہے کہ الیکشن کمیشن کے قانون کے مطابق نگران حکومت تقرر و تبادلے نہیں کر سکتی، حالیہ جتنے بھی تبادلے ہوئے، الیکشن کمیشن کے کہنے اور ہماری مشاورت سے ہوئے ہیں۔ گورنرز کو تبدیل کرنے پر بھی غور ہو رہا ہے، حتمی فیصلہ الیکشن کمیشن نے کرنا ہے۔ انہوں نے مزید کہا کہ کوئی بھی ہو اگر وہ کسی کو کوئی فائدہ پہنچا رہا ہے تو اسے ہٹا دینا چاہئے۔ گورنرز کی تبدیلی کیلئے میں اپنی رائے کا اظہار کر رہا ہوں اور کرتا رہوں گا، اچھا ہے کہ یہ بحث ہو رہی ہے، دُعا ہے کہ نتیجہ اچھا نکلے۔ ضیا شاہد نے کہا کہ آپ اپنی رائے اور مشورہ تو دیں کہ بلدیاتی اداروں کے منتخب ارکان کو 2 مہینوں کیلئے معطل کریں۔ 2008ءمیں اس کی معطلی کی مثال موجود ہے؟ نگران وزیر اطلاعات پنجاب احمد وقاص نے کہا ہے کہ نگران وزیراعلیٰ و کابینہ شفاف انتخابات کے لئے پوری کوشش کر رہے ہیں۔ الیکشن کمیشن سے تمام ہدایات لے رہے ہیں۔ بلدیاتی اداروں کے حوالے سے بھی ہدایات آئیں گی تو عمل کریں گے۔ بلدیاتی اداروں کو معطل کرنا الیکشن کمیشن کے دائرہ اختیار میں ہے۔ان خیالات کا اظہار انہوں نے چینل ۵ کے پروگرام ”ضیا شاہد کے ساتھ“ میں گفتگو کرتے ہوئے کیا۔

لاہور (خبر نگار) تحریک منہاج القران کے سربراہ علامہ ڈاکٹر طاہر القادری نے روزنامہ خبریں کے چیف ایڈیٹر ضیاشاہد سے ملاقات کے دوران کہا کہ ہمارے ملک کی بدقسمتی ہے کہ جہاں پر سابقہ حکمرانوں کی طرف سے سیاسی طور ملک کے گورنرز کا انتخاب کر کے تعینات کیا جاتا ہے جو عام انتخابات میں اپنی سابق حکومت کے ساتھ وفاداری نبھاتے ہوئے ٹکٹیں تقسیم کر رہے ہوں اور اپنے گورنر ہاوس کو سابقہ حکمرانوں کا مسکن بنا لیں وہاں شفاف الیکشن کیسے ہونگے گورنرز اپنی اولادوں کو الیکشن لڑوا رہے ہوں حالانکہ ملک کے گورنرز غیر سیاسی ہوتے ہیں اور یہ ریاستی ادارے کے نمائندے ہیں لیکن یہاں سب الٹا چل رہا ہے ۔بلدیاتی نمائندے جن میں مئیر سے لے کر کونسلر تک سب الیکشن کمپین میںمصروف ہیں جو سابق حکمرانوں کو جتوانے کے چکر میں ہیں جب بلدیاتی اداروں کے الیکشن ہوئے تھے تو یہ بات واضح تھی۔ شہروں میں مئیر ،ڈپٹی مئیر جو سابقہ ن لیگ حکومت سے وابسطہ ہیں ان کی جماعت کے پلیٹ فارم سے منتخب ہوئے ہیں جو دن رات سابقہ حکومت کے امیدواروں کی کمپین میں مصروف ہیں اور یہ لوگ سرکاری مشینری کا بے دریغ استعمال کر رہے ہیں ان کا مزید کہنا تھا کہ زیادہ آبادی دیہاتوں مین ہے وہاں یوسی کونسلر اور یوسی چیرمین کا بہت اثر روسوخ ہوتا ہے عوام ان تک محدود رہتے ہیں اب بھی ان کے ذریعے حکومتی فنڈز استعمال کئے جارہے ہیں 2008ءدور حکومت میں سیکرٹری الیکشن کمیشن نے بلدیاتی نظام معطل کردیا تھا لیکن موجودہ الیکشن کمیشن کیا کر رہا ہے میری سمجھ سے بالا تر ہے جبکہ اس نظام کو آنے والی حکومت تک معطل کردینا چاہیے تمام ترقیاتی سرکاری فنڈز بند کر دینے چاہیے اگر ایسے رہا تو مجھے نہیں لگتا جنرل الیکشن صفاف شفاف ہونگے ۔علامہ طاہر القادری نے سرکاری مشینری کا ذکرکرتے ہوے ہوئے کہا کہ ن لیگ پچھلے کئی داہائیوں سے اس ملک پر حکمرانی کر رہی ہے اس دوران ملکی بیوروکریسی میں اپنی اتنی نرسری پیدا کی ہے ایک عام کلرک سے لے کر اے سی ،ڈی سی ،کمشنر ،ڈی پی او ،آر پی اوحتی کہ علاقے کا ایس ایچ اوز ان کے اپنی نرسری کے ہیں جس سے اچھے کی امید کرنا بہت مشکل ہے ۔ضیا شاہد کے سوال پر علامہ ڈاکٹر طاہر القادری کا کہنا تھا کہ 62.63شق کے حوالے سے ہم نے یہ ایجنڈا پہلے 23دسمبر 2012ءکو مینار پاکستان پر ہونے والے جلسے میں دیا تھا بعد میںجنوری 2013 اسلام آباد میں اس حوالے سے دھرنا بھی دیا تھا اس وقت کی پیپلز پارٹی کی حکومت نے ہمیں یقین دھانی کراوئی اور معاہدہ بھی ہوا جس پر ہم نے دھرنا ختم کیا تھا لیکن اس بارے آج تک کوئی پیش رفت نہیں ہوئی اور نہ ہی اس پر عمل کیا گیا بلکہ سابقہ پارلیمنٹ نے تو اس بارے تمام شقیںہی ختم کردیں جو بہت بڑا لمیہ ہے ہمارے ملک میں چوروں ،لیٹروں ،قاتلوں کو الیکشن لڑنے کی کھلی چھٹی مل چکی ہے انہوں نے اس شق بارے بڑا انکشاف کرتے ہوئے کہا کہ آنے والی نئی حکومت اس شق 62،63کو آئین سے ہی نکال دے گی جب بھی ان کو موقع ملا کیونکہ اس ملک میں سب مفاد پرست لوگ ہیں اپنے مفاد کی جنگ لڑ رہے ہیں عوام اور پاکستان کا ان میں سے کوئی نہیں سوچ رہا انہوں نے 62،63کے حوالے مزید کہا کہ اس آرٹیکل بارے سیاستدانوں نے تو کچھ نہیں کیا لیکن ہمارے اس ایجنڈے سے عوام کو خوب آگاہی ملی ہے آج ایک عام آدمی ،کسان ،ریڑی چلانے والا ،مزدور ،طالب علم اور ہماری نئی نسل آگاہ ہوگئی ہے آج اس بارے ہر جگہ گفتگو جاری ہے جو سیاستدانوں کےلئے شرمندگی کا باعث بن ہوئی ہے اس پر عدلیہ نے بھی اہم کردار ادا کیا ہے اب ہر فیصلے میں آرٹیکل 62 , 63کی بات ہوتی ہے جس کی مثال سابق وزیراعظم نواز شریف ہیں اور دیگر لوگ بھی ہیں علامہ طاہر القادری نے مزید کہا کہ میری نظر میں سابقہ دور حکومت شر تھا لیکن آنے والی حکومت میں مجھے شر اور مایوسی اکٹھے نظر آرہی ہے۔

لاہور(مانیٹرنگ ڈیسک) ملک بھر میں آئندہ انتخابات کیلئے کاغذات نامزدگی کا عمل مکمل ہوچکااور سکروٹنی کے عمل سے گذرنے کے بعد امیدواروں کے نام تقریباً فائنل ہوچکے، تاہم ملک بھر میں سیاسی ہلچل عروج پر ہے، (ن) لیگ اور تحریک انصاف الیکشن میں ایک دوسرے کو ٹکر دے رہے ہیں، پیپلزپارٹی اور اے این پی بھی اس دوڑ میں شامل ہیں، ن لیگ اس وقت مشکلات کا شکار ہے کیونکہ چوھدری نثار اور زعیم قادری کی جانب سے پارٹی کو بڑا دھچکا دیاگیاہے، دوسری جانب الیکشن کمیشن کے مطابق اس وقت ملک میں نامزد ووٹرز کی تعداد 10کروڑ 55لاکھ59ہزار 4سو 6 ہے، چینل فائیو کے خصوصی پروگرام ” ہاٹ لنچ“ میں ملک بھر سے الیکشن کے قریب سیاسی گہما گہمی کی صورتحال پیش کی گئی، سکھر سے نمائندہ چینل فائیو ندیم سرکی نے الیکشن کے حوالے سے صورتحال بارے بتاتے ہوئے کہا کہ الیکشن 2018ءآتے ہی پیپلزپارٹی اور دیگر پارٹیوں کی جانب سے کارنر میٹنگز ، عید ملن پارٹی اور کارکنان کی رابطہ مہم شروع ہوچکی ہے ، پیپلزپارٹی کے گڑھ سکھر کے دو حلقوں این اے 206 میں خورشید شاہ اور جے ڈی آئی کی نصرت سحر عباسی جبکہ دوسرے حلقے میں نعمان اسلام شیخ اور تحریک انصاف جتوئی کے درمیان سخت مقابلہ متوقع ہے، ہر مرتبہ سکھر سے تمام چھ سیٹیں لینے والی پیپلزپارٹی کیلئے اس بار سیٹیں لینا مشکل ہے کہ عوام پیپلزپارٹی سے نالاں ہوکر تحریک انصاف کو ووٹ دینا چاہتی ہے ، عوام کا کہنا ہے کہ موجودہ پیپلزپارٹی بھٹو کی پارٹی نہیں ہے، انہوں نے عوام سے روٹی کپڑا اور مکان چھین لیا ہے ، پروگرام میں سرگودھا سے نمائندہ چینل فائیو امبر رضا نے سیاسی صورتحال بتاتے ہوئے کہا کہ سرگودھا میں سیاسی گرما گرمی اور جوڑ توڑ کا سلسلہ عروج پر ہے، جگہ جگہ کمپئن دفاتر پارٹیوں کی نمائندگی کررہے ہیں، جبکہ بڑی تعداد میں آزاد امیدوار بھی میدان میں ہیں، پی پی 79 سے 22سے زائد امیدوار صوبائی اسمبلی کی سیٹ پر حصہ لے رہے ہیں، آزاد امیدواروں میں اکمل سندھو، نذیر ثوبی، تحریک انصاف سے فیصل جاوید گھمن اور مسلم لیگ ن کے رانا منور غوث حلقہ کے مضبوط امیدوار تصور کئے جارہے ہیں، اس موقع پر سرگودھا کے شہریوں کا کہناتھا کہ گھر گھر جاکر ووٹ مانگنے والے سیاسی کارکن جیتنے کے بعد نظر نہیں آتے اور حلقوں کے عوام شدید مشکلات کا شکار رہتے ہیں، صادق آباد سے سیاسی ہلچل کے حوالے سے نمائندہ چینل فائیو اللہ وسایا نے بتایا کہ کاغذات نامزدگی کی سکروٹنی کے بعد امیدواروں نے الیکشن دفاتر قائم کرلئے ہیں، صادق آباد کے دو قومی اور تین صوبائی حلقوں میں این اے 138سے پیپلزپارٹی کے مخدوم سید مصطفی اور تحریک انصاف کے رئیس محبوب اور این اے 180میں پیپلزپارٹی کے مخدوم سید مرتضیٰ کے مقابل ن لیگ کے 2بار مسلسل رکن اسمبلی سردار ارشد خان لغاری اور تحریک انصاف کے رئیس محبوب احمد اور آزاد امیدوار ندیم عباس چیمہ کے درمیان سخت مقابلہ ہوگا، صوبائی حلقوں میں پی پی 265 سے سردار رئیس نبیل احمد اور ن لیگ کے صفدر لغاری ، 266 سے ن لیگ کے چوھدری شوکت داو¿د اور پیپلزپارٹی کے ممتاز احمد ، 267سے مسلم لیگی امیدوار چوھدری شفیق اور تحریک انصاف کے سجاد وڑائچ کے درمیان کڑا مقابلہ متوقع ہے، ن لیگ کے قلعہ وہاڑی سے نمائندہ چینل فائیو حاجی ظفر اللہ نے گفتگو کرتے ہوئے انتخابی سرگرمیوں کے حوالے سے کہا کہ حلقہ این اے 164وہاڑی میں سب سے زیادہ سیاسی گہما گہمی نظر آرہی ہے ، ن لیگ کی امیدوار تہمینہ دولتانہ کے مد مقابل تحریک انصاف کے طارق اقبال چوھدری ہیں جو اس سے قبل تہمینہ دولتانہ کو دو بار ہرا چکے ہیں، وہاڑی میں تحریک انصاف کی پوزیشن مضبوط ہے ، تحریک انصاف کی ضلعی صدر خواتین ونگ نے اس موقع پر کہا کہ وہاڑی میں تحریک انصاف این اے 164 سے ن لیگ کو بھاری مینڈیٹ سے شکست دیگی، پشاور سے نمائندہ چینل فائیو گوہر علی شاہ کا کہناتھا کہ پشاور میں 5قومی اور 14صوبائی حلقوں سے اہم سیاسی شخصیات کا ٹاکرا ہوگا، قومی اسمبلی کی نشستوں پر پیپلزپارٹی سے ارباب عالمگیر ، اسماءعالمگیر ، اے این پی سے حاجی غلام بلور اور تحریک انصاف کے حاجی شوکت علی کے درمیان سخت مقابلہ ہوگا، نوشہرہ سے سابق وزیر اعلیٰ پرویز خٹک کا مقابلہ عائشہ گلالئی سے ہوگا، سابق سپیکر عبدالاکبر خان کی اہلیہ بھی انتخابات میں حصہ لیں گی، دیپالپور سے نمائندہ محمد شہزاد نے بتایا کہ این اے 143سے مسلم لیگ کے راو¿ اجمل کے مقابل منظور احمد وٹو آزاد حیثیت سے الیکشن لڑیںگے۔