لاہور : (ویب ڈیسک) لاہور ہائیکورٹ نے عمران خان کو پیش ہونے کیلیے آخری موقع دے دیا۔
لاہور ہائیکورٹ نے عمران خان کو پانچ بجے تک پیش کرنے کا حکم دیتے ہوئے پیشی کے لیے آخری موقع دے دیا۔ عدالت نے کہا اگر عمران خان کو پیش نہ کیا تو توہین عدالت کی کارروائی شروع کر یں گے
لاہور ہائیکورٹ میں عمران خان کی حفاظتی ضمانت کیس کی سماعت ہوئی۔ چیئرمین پی ٹی آئی عمران خان لاہور ہائیکورٹ میں پیش نہ ہوئے۔ وکیل نے عدالے میں موقف اپنایا کہ مال روڈ پر ٹریفک بہت زیادہ جام ہے۔آئی جی پنجاب ایک گھنٹہ دے دیں ہم مال روڈ کلیئر کر دیں گے۔
انہوں نے عدالت میں بتایا کہ عمران خان اپنی حفاظتی ضمانت کی درخواست واپس لینا چاہتے ہیں۔ جسٹس طارق سلیم سے استفسار کیا کہ عمران خان کی درخواست کس نے کس کے کہنے ہر فائل کی؟
وکیل نے بتایا کہ عمران خان کے دستخطوں سے یہ درخواست فائل نہیں ہوئی۔ میں نے کوئی درخواست فائل نہیں کی۔ وکیل خواجہ طارق رحیم نے کہامیں عدالت سے حفاظتی ضمانت مانگ ہی نہیں رہا۔عمران خان کی درخواست ضمانت پر دستخط جعلی ہے۔
جسٹس طارق سلیم شیخ نے اظہار برہمی کرتے ہوئے کہا آپ کو چاہیے تھا معافی مانگتے۔اب میں شوکاز نوٹس جاری کروں گا۔ آپ تسلی سے جواب تیار کیجیے گا۔
وکیل نے عدالت سے استدعا کی کہ عدالت اگر کل تک کا وقت دے تو عمران خان پیش ہوجائیں گے۔رجسٹرار نے گاڑی مسجد گیٹ سے داخل ہونے کی درخواست بھی مسترد کی۔ہمیں کہا گیا تھا کہ مال روڈ ٹریفک کے لیے فری ہوگا۔
وکیل نے کہا کہ ہم نے سیکیورٹی کے معاملے پر پولیس حکام سے ملاقاتیں بھی کیں۔عدالت نے حکم دیا تھا کہ عمران خان کی پیشی پر سیکیورٹی انتظامات کیے جائیں۔میں عمران خان کو کل ہی پیش کر دوں گا۔
وکیل نے عدالت میں کہا کہ ہم آنا چاہتے ہیں لیکن آنے نہیں دیا جا رہا۔آپ کسی کو بھی ساتھ بھیج دیں بیشک چیک کرلیں۔آپ 4یا5 بجے کےلیے رکھ دیں ہم ابھی پیش کر دیتے ہیں۔
جسٹس طارق سلیم شیخ نے ریمارکس دیے کہ عمران خان لیڈر اور رول ماڈل ہیں ۔ہم نے آپکو بار بار موقع دیا۔جس طرح آپکو سہولت دی ایسی کسی نے نہیں دی ہوگی۔
وکیل نے عدالت میں عمران خان کو پانچ بجے تک پیش کرنے کی یقین دہانی کرادی۔لاہورہائیکورٹ نے عمران خان کو 5بجے تک پیش کرنے کی مہلت دے دی۔ کہا اگر عمران خان کو پیش نہ کیا تو توہین عدالت کی کارروائی شروع کر یں گے۔

اسلام آباد: (ویب ڈیسک) سپریم کورٹ آف پاکستان میں صوبہ پنجاب اور خیبرپختونخوا میں الیکشن کی تاریخ کے اعلان کیلئے نئی درخواست دائر کر دی گئی۔
دونوں صوبائی اسمبلیوں کے انتخابات کی تاریخ کے حوالے سے سپریم کورٹ میں درخواست پنجاب اور خیبرپختونخوا اسمبلیوں کے سپیکرز نے دائر کی ہے۔
درخواست میں استدعا کی گئی ہے کہ پنجاب اور خیبرپختونخوا کی اسمبلیوں کی تحلیل کو 1 ماہ سے زیادہ وقت گزر چکا ہے، گورنرز آئین کے مطابق انتخابات کی تاریخ کا اعلان نہیں کر رہے، انتخابات کروانا الیکشن کمیشن کی ذمہ داری ہے، سپریم کورٹ دونوں صوبوں کے گورنرز کو انتخابات کی تاریخ کے اعلان کا حکم دے۔
درخواست میں صوبائی گورنرز، الیکشن کمیشن، صدر مملکت کو فریق بنایا گیا ہے، خیبرپختونخوا اور پنجاب حکومتیں بھی فریقین میں شامل ہیں۔

راولپنڈی: (ویب ڈیسک) وفاقی وزیر داخلہ رانا ثناء اللہ نے صدر مملکت ڈاکٹر عارف علوی کو خبردار کر دیا۔
وزیر داخلہ رانا ثناء اللہ نے کہا کہ صدر علوی “آ بیل مجھے مار” والے کام نہ کریں، آئین کی حد میں رہیں، صدر کے دفتر کو بلیک میلنگ کا اڈہ نہ بنائیں، الیکشن کی تاریخ دینے سے صدر کا کوئی لینا دینا نہیں، عارف علوی خوامخواہ ٹانگ نہ اڑائیں۔
ان کا کہنا تھا کہ صدر الیکشن کمیشن کو غیرقانونی اور غیر آئینی احکامات پر مجبور نہیں کر سکتا، الیکشن کمیشن آپ کا غلام نہیں کہ جو آپ کہیں وہ مانے۔
وفاقی وزیر نے مزید کہا کہ عمران خان نے معیشت، خارجہ تعلقات اور قومی مفادات کو نقصان پہنچایا، آپ ریاستی سربراہ کے منصب کو سازش کے لئے استعمال کر رہے ہیں۔

اسلام آباد: (ویب ڈیسک) وفاقی وزیر اطلاعات مریم اورنگزیب نے کہا ہے کہ ایوان صدر ایوان سازش بن چکا ہے، الیکشن کمیشن آئینی ادارہ ہے، عمران خان کی ٹائیگر فورس نہیں بننے دیں گے۔
اپنے ایک بیان میں مریم اورنگزیب کا کہنا تھا کہ الیکشن کمیشن پر دباؤ ڈال کر غیر آئینی طور پر الیکشن کی تاریخ لینے کی کوشش ہو رہی ہے، صدر عارف علوی نے آئین شکنی کی تو آرٹیکل 6 کا سامنا کرنا ہوگا، آئین کو ٹھوکر ماری تو علوی صدر نہیں رہیں گے۔
انہوں نے کہا کہ علوی صدر بنیں، عمران خان کی کٹھ پتلی نہ بنیں، صدر علوی کی وفاداری آئین سے ہونی چاہیئے، عارف علوی قومی اسمبلی تحلیل کر کے پہلے ہی آئین شکنی کر چکے ہیں۔
وفاقی وزیر نے مزید کہا کہ سپریم کورٹ کی تشریح کے مطابق صدر مملکت کا عہدہ علامتی ہے، سپریم کورٹ کے مطابق کسی ایک سیاسی جماعت کے ساتھ ساز باز صدر کے منصب اور حلف کی خلاف ورزی ہے۔

لاہور: (ویب ڈیسک) لاہور ہائیکورٹ نے نگراں حکومت کے اختیارات سے متعلق درخواستوں پر فیصلہ محفوظ کر لیا۔
جسٹس علی باقر نجفی کے سربراہی پر مشتمل لارجر بینچ کچھ دیر بعد فیصلہ سنائے گا۔
واضح رہے کہ تحریک انصاف کے حماد اظہر سمیت دیگر نے نگراں حکومت کی جانب سے ٹرانسفر اور پوسٹنگ کو چیلنج کر رکھا ہے۔
دائر درخواست میں حکومت پنجاب، وزیراعلیٰ پنجاب اور الیکشن کمیشن کو فریق بنایا گیا جس میں کہا گیا ہے کہ نگراں حکومت نے غیر قانونی اقدام کرتے ہوئے پنجاب بھر میں افسروں اور اسسٹنٹ کمشنرز کے تبادلے کردئیے، نگراں حکومت کو تقرر و تبادلوں کا کوئی آئینی اور قانونی اختیار حاصل نہیں۔
درخواست گزار نے کہا کہ نگراں حکومت کا کام انتخابات کروانے کے لیے الیکشن کمیشن کو معاونت فراہم کرنا ہے، قانون کے تحت ٹینیور پوسٹ پر موجود افسروں کو عہدے کی میعاد مکمل ہونے تک ٹرانسفر نہیں کیا جاسکتا، افسروں کے تبادلوں سے عام سائلین اور شہریوں کو مشکلات کا سامنا ہے۔
درخواست میں موقف اختیار کیا گیا ہے کہ نگراں حکومت نے سیاسی مفادات کے لیے افسروں کے تبادلے کر کے غیر قانونی اقدام کیا، عدالت افسروں اور اسسٹنٹ کمشنرز کے تبادلوں کے نوٹیفکیشن کو کالعدم قرار دے۔

اسلام آباد: (ویب ڈیسک) انسداد دہشتگردی عدالت نے چیئرمین پاکستان تحریک انصاف اور سابق وزیراعظم عمران خان کیخلاف پی ٹی وی اور پارلیمنٹ حملہ کیس سے دہشتگردی کی دفعات خارج کر دیں۔
انسداددہشتگردی عدالت میں چیئرمین پی ٹی آئی کیخلاف پی ٹی وی اور پارلیمنٹ حملہ کیس میں دہشتگردی کی دفعات کیخلاف درخواست پر سماعت ہوئی۔
دوران سماعت عدالت نے پی ٹی وی اور پارلیمنٹ حملہ کیس سے دہشتگردی کی دفعات خارج کر دیں، انسداد دہشتگردی عدالت کے جج راجہ جواد عباس حسن نے فیصلہ سنایا۔
عمران خان کے شریک ملزم نے دہشت گردی کی دفعات خارج کرنے کی درخواست دائر کی تھی جبکہ عمران خان کے وکیل نعیم حیدر پنجوتھہ و انتظار حسین پنجوتھہ ایڈوکیٹ نے درخواست دی تھی۔
اے ٹی سی نے دہشتگردی کی دفعات نکال کر کیس سیشن کورٹ کو بھیج دیا۔
یاد رہے کہ 2014 میں پی ٹی آئی کے دھرنے میں پی ٹی وی اور پارلیمنٹ پر حملے کے مقدمات درج کئے گئے تھے، جس میں دہشتگردی کی دفعات بھی شامل کی گئی تھیں۔

لاہور: (ویب ڈیسک) پاکستان تحریک انصاف کے چیئرمین عمران خان نے غیرمصدقہ آڈیواور ویڈیو لیکس کے تدارک کے معاملے پر چیف جسٹس پاکستان سمیت سپریم کورٹ کے تمام ججز کو خط لکھ دیا۔
سابق وزیراعظم عمران خان کی جانب سے معاملے پر گزشتہ سال اکتوبر میں دائر آئینی درخواست فوری سماعت کیلئے مقرر کرنے کی استدعا کی گئی ہے۔
چیئرمین پی ٹی آئی نے آرٹیکل 14 کے تحت شہریوں کے پرائیویسی کے حق کے تحفظ کیلئے اقدامات کی بھی استدعا کی ہے۔
عمران خان نے خط میں کہا کہ گزشتہ کئی ماہ سے غیرمصدقہ آڈیوز، ویڈیوز کے منظرعام پر آنے کا سلسلہ جاری ہے، آڈیوز ویڈیوز کو جعلی طریقوں سے تیار کیا جاتا ہے، جعلی آڈیوز ویڈیوز کے ذریعے تنقیدی آوازوں کو دبایا جانا مقصود ہے۔

اسلام آباد: (ویب ڈیسک) پاکستان مسلم لیگ (ن) کے رہنما جاوید لطیف نے مہنگائی پر جے آئی ٹی بنانے کا مطالبہ کرتے ہوئے کہا ہے کہ آج اگر منصفانہ فیصلے نہ کیے گئے تو بہت دیر ہوجائے گی، آج بھی وقت ہے سنبھل جائیں۔
اپنے ایک بیان میں لیگی رہنما جاوید لطیف نے کہا کہ ہم نے اپنی قربانی ریاست کیلئے دی تھی، قومی جماعتیں ریاست پر قربان ہونے کیلئے بنتی ہیں، آج اپنی ذات کیلئے ریاست کو قربان کیا جا رہا ہے، آج جو آڈیو، ویڈیو آ رہی ہیں کیا ان کیلئے جے آئی ٹی نہیں بن سکتی۔
انہوں نے کہا آج ہر بستی میں آگ سلگ رہی ہے، عمران خان آگ پر پٹرول چھڑکنے کیلئے بے تاب ہیں، عمران خان اداروں سے اپنی مرضی کے مطابق فیصلے چاہتے ہیں، عمران خان پر حملے کی شفاف تحقیقات ہونی چاہئیں لیکن کیا لوگ نہیں جانتے کہ پلستر کیسے لگا، لوگ جانتے ہیں کہ پلستر اتنی دیر نہیں رہتا۔

لاہور: (ویب ڈیسک) پاکستان تحریک انصاف کے رہنماؤں نے سابق وزیراعظم عمران خان پر دوبارہ حملے کے خدشے کا اظہار کر دیا۔
سیکرٹری جنرل تحریک انصاف اسد عمر نے پریس کانفرنس میں کہا کہ عمران خان کوئی عام پاکستانی نہیں ہیں، عمران خان وہ واحد لیڈر ہیں جن پر منصوبے کے تحت قاتلانہ حملہ ہوا ہے، چیئرمین پی ٹی آئی پر حملے کا خدشہ ہے، سکیورٹی کے انتظامات کی ذمہ داری حکومت کی بنتی ہے، جس ہڈی میں گولی لگی عمران خان کی وہ ہڈی ابھی تک ٹھیک نہیں ہوئی، اگر ذرا سا بھی جھٹکا لگتا ہے تو الگے 2 سے 3 ماہ ان کو چلنے میں دشواری ہوگی۔
رہنما تحریک انصاف کا کہنا تھا کہ اکتوبر میں الیکشن کمیشن کے باہر ایک پرامن مظاہرہ ہوا، عمران خان پر سارے کے سارے جھوٹے مقدمے کئے گئے ہیں، عمران خان نے ہمیشہ عدالتوں کا احترام کیا ہے، انہیں کسی عدالت میں جانے پر اعتراض نہیں تھا، نومبر میں عمران خان پر حملہ کروایا گیا، عمران خان کا انا کا مسئلہ نہیں ہے، ڈاکٹرز کی ہدایات کی وجہ سے عدالتوں میں نہیں جا رہے۔
انہوں نے کہا عدلیہ کو دباؤ میں لانے کے لئے ایک منظم مہم چلائی جا رہی ہے، اگر الیکشن 9 روز میں نہیں کرائے تو ان کو آئین توڑنا پڑے گا، عدلیہ مجھ پر عمران خان پر توہین عدالت کا کیس چلا چکی ہے، امید ہے سب کے ساتھ برابری والا رویہ رکھا جائے گا، یہ سارے ملک میں سنسنی پھیلا رہے ہیں، ہم انتظار کر رہے ہیں، رانا ثنا اللہ ،خواجہ آصف پر غداری کا پرچہ کب کٹوائیں گے۔
سابق وفاقی وزیر خزانہ کا مزید کہنا تھا کہ مہنگائی سے عوام پس چکے ہیں، گیس کی قیمتیں 46 فیصد بڑھانے کا اعلان ہوا ہے، روزمرہ کی ضرورت پوری کرنا ناممکن ہوتا جارہا ہے، یہاں سیاسی انتشار پیدا کیا گیا، سیاسی بحران نے معاشی بحران کو جنم دیا ہے، اگلے 3 ماہ بعد اس سے بھی زیادہ حالات خراب ہوں گے، پوراحکومتی نظام عمران خان کی گرفتاری میں لگا ہوا ہے، گھر بیٹھے ہوئے ٹویٹ کرنے والے بچوں کو گرفتار کیا جا رہا ہے، جب تک سیاست ٹھیک نہیں کرو گے معیشت ٹھیک نہیں ہوسکتی۔
شبلی فراز
اس موقع پر سابق وفاقی وزیر شبلی فراز کا کہنا تھا کہ عمران خان کے عدالت پیش نہ ہونے کی دو وجوہات تھیں، ٹانگ کا زخم اور سکیورٹی خدشات، وزیرآباد میں عمران خان پر قاتلانہ حملہ ہوا، عمران خان قاتلانہ حملے سے پہلے 25 پیشیاں بھگت چکے ہیں، ہمارا آج یہی سوال ہے اگر عمران خان کو کچھ ہوگیا تو کون ذمہ دار ہوگا۔

اسلام آباد: (ویب ڈیسک) شعبان کا چاند دیکھنے کے لیے مرکزی رویت ہلال کمیٹی کا اجلاس کل شام طلب کر لیا گیا۔
چیئرمین مولانا عبدالخبیر آزاد کی زیر صدارت رویت ہلال کمیٹی کا اجلاس کل شام اسلام آباد میں ہو گا، جس میں شعبان کا چاند دیکھا جائے گا۔
واضح رہے کہ آج رجب کی 28 تاریخ ہے جبکہ ہفتے اور اتوار کی درمیانی رات کو ملک بھر میں شب معراج عقیدت و احترام سے منائی گئی۔