کیلیفورنیا: (ویب ڈیسک) میٹا کی ذیلی ایپلی کیشن واٹس ایپ نے ایپ کے کچھ جعلی ورژن سامنے آنے کے بعد صارفین کے لیے انتباہ جاری کرتے ہوئےصارفین کو کسی مشکل میں نہ پھنسے کے لیے واٹس ایپ کے جعلی ورژن ڈاؤن لوڈ نہ کرنے کا مشورہ دیا ہے۔
ذرائع کے مطابق واٹس ایپ کی سائبر سیکیورٹی ٹیم کے سامنے ایسی مشکوک ایپلی کیشنز آئی ہیں جو واٹس ایپ کی طرح کی خدمات انجام دیتی ہیں۔ یہ سافٹ ویئر گوگل پلے سے ہٹ کر ڈاؤن لوڈ کرنے کے لیے میسر ہیں۔ ان سافٹ ویئر میں ‘Hey WhatsApp’ اور ‘Hey Mod’ اور دیگر نقول شامل ہیں۔
ایپ کے یہ جعلی ورژن خود کو حقیقی واٹس ایپ ایپلی کیشن جیسا بتا کر صارفین کو گمراہ کرنے کی کوشش کر رہے ہیں۔ اسی وجہ سے واٹس ایپ کے سربراہ وِل کیٹھ کارٹ نے صارفین کو خبردار کیا ہے کہ وہ ان جعلی ایپلی کیشنز کو اپنے فونز میں ڈاؤن لوڈ نہ کریں تاکہ کسی قسم کی سیکیورٹی خلاف ورزی سےبچا جا سکے۔
سی ای او واٹس ایپ نے اپنے ٹویٹ میں بتایا کہ واٹس ایپ کی سائبر سیکیورٹی ٹیم کو ان ایپلی کیشنز میں چھپے ہوئے میل ویئر ملے ہیں جو ‘HeyMods’ کے بنائے ہوئے ہیں۔
وِل کیٹھ کارٹ نے اینڈرائیڈ ڈیواسز میں نقصان دہ ایپلی کیشنز کے پھیلنے کی روک تھام کے لیے کیے جانے والے اقدامات پر گوگل کو سراہا۔

کیلیفورنیا: (ویب ڈیسک) سوشل میڈیا ایپلی کیشن اسنیپ چیٹ نے بالآخر اپنا ویب ورژن جاری کردیا ہے۔
ویب ورژن پر امریکا، برطانیہ اور کینیڈا کے اسنیپ چیٹ+ سبسکرائبر اور آسٹریلیا اور نیوزی لینڈ سے تعلق رکھنے والے ریگولر صارفین ایک دوسرے کو میسج اور کال کرسکیں گے۔
اسنیپ چیٹ نے حال ہی میں اسنیپ چیٹ+ پریمیئم ٹیئر اضافی لیکن مصنوعی فیچرز کے ساتھ جاری کیا تھا۔ ان فیچرز میں ایپ کے نشان کے اسٹائل میں تبدیلی، یہ دیکھنا کہ کس نے اسٹوری دوبارہ دیکھی اور اپنے کسی دوست کو ’بی ایف ایف‘ بنانا اور ان کو اپنی چیٹ ہسٹری میں سب سے اوپر پِن کرنا شامل تھا۔
ویب کے لیے اسنیپ چیٹ میں ری ایکشن، رپلائی جیسے فیچرز شامل ہیں اور جلد ہی ویڈیو کالز کے لیے لینسز بھی شامل کردیے جائیں گے۔
ایپ کی جانب سے جاری کردہ پریس ریلیز میں کہا گیا ہے کہ تمام پروڈکٹس کی طرح ہماری ٹیم نے ویب کے لیے اسنیپ چیٹ پرائیویسی مدنظر رکھتے ہوئے ڈیزائن کی ہے۔ ہم نے یہ ایک منفرد پرائیویسی اسکرین کے ساتھ لانچ کیا ہے جو کچھ اور کام کرنے پر اسنیپ چیٹ کی وِنڈو کو چُھپا دے گی۔

بیجنگ: (ویب ڈیسک) کیا خاص قسم کی آواز سے درد کا علاج ممکن ہے؟ اس کا جواب ایک تجربات کے بعد اثبات میں ظاہر ہوا ہے۔
سائنسدانوں کی بین الاقوامی ٹیم نے مشہورتحقیقی جریدے ’سائنس‘ میں اپنی تحقیق شائع کرائی ہے جو چوہوں پر تجربات سے متعلق ہے۔ چین کی جامعہ سائنس و ٹیکنالوجی نے دیگر کئی اداروں کے تعاون سے یہ تحقیق کی ہے۔
تجرباتی تحقیق سے وابستہ سائنسداں رینا ڈی سوزا کہتے ہیں کہ شدید اور دیرینہ درد کو دور کرنا ایک مسئلہ ہے جسے حل کرنے کےلیے مؤثر تدابیر کی ضرورت ہے، اس کےلیے درد کی کیفیت کو گہرائی سے جاننا بہت ضروری ہے۔ چوہوں میں آواز سے درد دور کرنے کے طریقے سے ہم ’درد دور کرنے کی تھراپی‘ کی نئی راہ تلاش کرسکتے ہیں۔
1960 کے عشرے سے معلوم ہوا کہ بعض اقسام کے سر، موسیقی اور آوازیں انسانوں میں درد کی شدت کم کرسکتے ہں۔ ان میں دانت کا درد، سرجری کی تکلیف اور دیرینہ عارضے بھی شامل ہیں۔ لیکن اسے اعصابی نظام کے تحت سمجھنے کی خاص کوشش نہیں کی گئی تھی۔
تاہم ہم جانتے ہیں دماغ کے بعض گوشے آواز کےردِ عمل میں درد کی وجہ بننے والے اعصابی عمل کو کمزور کرسکتےہیں۔ سائنسدانوں نے چوہوں کے پیروں کے تلوے پر جلنے کا احساس پیدا کیا۔ پھر انہیں تین طرح کی آوازیں سنائیں جن میں مسحورکن میوزک، اسی میوزک کا بے سرا مجموعہ اور وائٹ نوائز سنائی گئی۔ جب ہلکی سی سرگوشی والی شدت سے یہ تینوں آوازیں انہیں سنائی گئیں تو حیرت انگیز طور پر تینوں آوازوں سے چوہوں کے درد میں کمی ہوئی۔ لیکن جیسے ہی ان تینوں آوازوں کو اونچا کیا گیا تو اس کا کوئی فائدہ نہ ہوا۔
یعنی آواز کوئی بھی ہو لیکن دھیمی شدت کی ہوتو وہ درد بھگاسکتی ہے۔ اسے دماغی طور پرسمجھنے کےلیے ماہرین نے دماغی گوشے، ’آڈیٹری کارٹیکس‘ کا جائزہ لیا جو آواز کو پروسیس کرتا ہے۔ کم شدت کی آواز درد کی وجہ بننے والے نیورون کو کمزور کردیتی ہے۔
جیسے ہی آواز بند کی گئی چوہوں میں درد بڑھ گیا۔ اگرچہ یہ ابتدائی تحقیق ہے لیکن اتنا ضرور معلوم ہوا ہے کہ دھیمی آوازوں سے دماغ کے بعض حصوں میں درد کم کیا جاسکتا ہے۔ تاہم اس ضمن میں مزید انسانی تجربات کی ضرورت ہے جس سے مزید نئے انکشافات متوقع ہیں۔