لاہور: (ویب ڈیسک) پنجاب کے 20 حلقوں میں ضمنی انتخاب کیلئے سیاسی جماعتوں کی انتخابی مہم ختم ہو گئی، آخری روز مسلم لیگ ن، تحریک انصاف سمیت امیدواروں نے بھرپور مہم چلائی۔
ضمنی انتخابات کیلئے پولنگ اتوار کو ہوگی، الیکشن کمیشن کی جانب سے تمام تر تیاریاں مکمل کر لی گئیں، آخری روز ضمنی الیکشن میں حصہ لینے والے تمام امیدواروں کی جانب سے بھرپور انتخابی مہم چلائی گئی۔
لاہور ملتان اور بھکر کے پولنگ اسٹیشنز پر رینجرز تعینات ہو گی جبکہ حساس پولنگ اسٹیشنز پر پاک فوج کے جوان بھی تعینات ہوں گے
الیکشن کمیشن آف پاکستان کی جانب سے ضابطہ اخلاق پر عملدرآمد کرانے کیلئے قانون نافذ کرنے والے اداروں کو ہدایات جاری کر دی گئیں۔

اسلام آباد: (ویب ڈیسک) ملک بھر میں کورونا کی چھٹی لہر میں خطرناک حد تک اضافہ ہونے لگا ہے، 4 ماہ بعد ایک ہی روز سب سے زیادہ 10 افراد جان کی بازی ہار گئے۔
قومی ادارہ صحت کے مطابق کورونا کیسز میں مسلسل تیزی سے اضافہ ریکارڈ کیا گیا ہے، گزشتہ چوبیس گھنٹے کے دوران 22 ہزار 451 ٹیسٹ کئے گئے جس میں سے 737 نئے کیسز سامنے آئے ہیں۔
این آئی ایچ کی رپورٹ کے مطابق 189 مریضوں کی حالت تشویشناک ہے، ملک میں کورونا مثبت کیسز کی شرح 3.28فیصد ریکارڈ کی گئی۔

اسلام آباد: (ویب ڈیسک) وزیراعظم کا چودھری نثار علی خان سے ٹیلیفونک رابطہ ہوا، سابق وفاقی وزیر کے بھانجے کے درجات کی بلندی اور لواحقین کیلئے صبر جمیل کی دعا بھی کی۔
وزیراعظم شہباز شریف نے چودھری نثار علی خان کے بھانجے کیپٹن نعمان کی وفات پر رنج و غم اور اہل خانہ سے ہمدردی کا اظہار کیا۔
چودھری نثار علی خان نے ہمدردی اور تعزیت کے اظہار پر وزیراعظم شہباز شریف کا شکریہ ادا کیا۔
خیال رہے کہ کیپٹن نعمان عید الاضحیٰ سے قبل روات چک بیلی روڈ پر بگا موڑ کے قریب ٹریفک حادثے میں جاں بحق ہوگئے تھے۔

لاہور: (ویب ڈیسک) سابق وزیراعظم عمران خان کا کہنا ہے کہ ایک جج نے کہا مجھ پر آرٹیکل 6 لگنا چاہیے۔
عمران خان کا پی پی 170 میں انتخابی جلسے سے خطاب میں کہنا تھا کہ سپریم کورٹ سے ادب سے پوچھنا چاہتا ہوں، ایک جج نے کہا ہے میرے اوپر آرٹیکل 6 لگنا چاہیے، عارف علوی اور قاسم سوری کا کیا قصور ہے؟
عمران خان نے مزید کہا کہ سپریم کورٹ نے کہا خط کے معاملے پر اس پر تحقیقات نہیں ہوئیں، سپریم کورٹ سے پوچھتا ہوں تحقیقات کس نے کرنی تھیں؟ اس حکومت کا کام تھا کمیشن بناتے مگر یہ کیسے بناتے؟ نواز شریف، شہباز شریف، آصف زرداری تو خود اس میں ملوث تھے۔
چیئرمین تحریک انصاف نے کہا کہ صدر نے خط لکھا کمیشن بناؤ اس کی تحقیقات کرو، ملک کے ساتھ اتنا بڑا سانحہ ہوتا ہےلیکن سپریم کورٹ سےبھی کوئی تحقیقات نہیں ہوتیں، سب کے سامنے کہتا ہوں لگاؤ آرٹیکل 6 مجھ پر۔
انہوں نے کہا کہ یہ کوئی عام الیکشن نہیں،دو قومی نظریےکا الیکشن ہے، ایک نظریہ امریکی غلامی کا نظریہ ہے، غلام نظریے کے لوگ ہرچیز کا سودا کرنے کیلئے تیار ہیں، انگریز کی غلامی کے بعد امریکا کی غلامی کیلئے ملک نہیں بنا تھا۔
عمران خان نے کہا کہ میں عدالت کے سامنے وہ باتیں بتاؤں گا جو ابھی تک قوم کو نہیں بتائیں۔

ملتان: (ویب ڈیسک) پاکستان مسلم لیگ (ن) کی نائب صدر مریم نواز نے عمران خان پر تنقید کرتے ہوئے کہا کہ اس نے اسلامی کارڈ بھی کھیلا، اس نے ہم سب پر توہین مذہب کے الزام لگائے، اس نے جھوٹے الزامات لگوا کر احسن اقبال پر گولیاں چلوائیں، کنٹینر پر کھڑے ہوکر آئین شکن کہتا ہے اسلامی ٹچ تو دو، سیاست میں مذہب کو استعمال کرنے والے سے بڑا مجرم کوئی نہیں ہوتا۔
ملتان میں جلسہ سے خطاب کرتے ہوئے حمزہ شہباز نے غریب کے لیے 100 یونٹ فری کیے، یہ فٹا فٹ 100 مفت یونٹ روکنے کے لیے عدالت چلا گیا، کوئی بات نہیں 17 جولائی کو جیتنے کے بعد مفت بجلی دیں گے، کسانوں کوچھوٹے بلاسود قرض دیں گے، پنجاب کے ٹیوب ویلوں کو سولر پر شفٹ کریں گے، نوجوانوں کو دوبارہ لیپ ٹاپ دیں گے، وعدہ کرو، 17 جولائی کو شیر پر مہر لگانا۔
انہوں نے کہا کہ ملتان والو، سلمان نعیم کو مبارکباد دیتی ہوں، ملتان کا جذبہ بتا رہا ہے سلمان جیت چکا ہے، ملتان اولیا کرام کی دھرتی ہے، کل شہباز شریف نے پٹرول، ڈیزل کی قیمتوں میں کمی کا اعلان کیا، خواتین کو اتنی بڑی تعداد میں دیکھ کر خون بڑھ گیا ہے، ملتان کے عوام کی محبت کو کبھی نہیں بھولوں گا۔
انہوں نے کہا کہ آج بہت ضروری باتیں کرنی ہیں درمیان میں چھوڑ کر نہ جانا، قیمتیں کم ہونے پر اڑھائی، 3 ماہ بعد سکون کی نیند سوئی، آج نواز شریف نے کہا قوم کو خوشخبری سنانا، عالمی منڈی میں قیمتیں کم ہونے پر مزید کم کریں گے، عمران خان بارودی سرنگیں بچھا کر گیا تھا، مسلم لیگ نے جان ہتھیلی پر رکھ کر بارودی سرنگیں ہٹا دی ہیں، آنے والے دنوں میں قوم کے لیے اچھی خبریں آئیں گی۔
ان کا مزید کہنا تھا کہ ملتان کی سڑکوں پر وافر مقدار میں سستا آٹا مل رہا ہے، انشا اللہ 17 جولائی کو معرکہ ہونے جارہا ہے، ملتان سے شیر کی آواز آئے گی، مسلم لیگ کے ساتھ یاری نبھاؤ گے ناں،17 جولائی کو الیکشن نہیں پنجاب کو لوٹنے والوں کے ساتھ جنگ ہے، خیبرپختونخوا بارشوں میں ڈوبا ہوا ہے، یہ پنجاب میں روز جھوٹ بول کر چلا جاتا ہے، میں اس شخص کا نام بھی نہیں لینا چاہتی، 2018 میں جھوٹے شخص نے جنوبی محاذ کا ڈرامہ رچایا تھا، اس نے جنوبی پنجاب کا الگ صوبہ بنانا تھا، اس نے کوئی نیا سکول، ہسپتال نہیں بنایا، خدارا عمران قوم سے جھوٹ مت بولو، جنوبی پنجاب کو اس نے تنہا چھوڑ دیا۔
مریم نواز نے کہا کہ کہتا ہے امریکا نے سازش کردی، سپریم کورٹ نے سازش کا بھانڈہ پھوڑ دیا، اس سازش کی آڑ میں اس نے پورے پاکستان میں انتشار، آگ پھیلانے کی کوشش کی، ہمیں چور، ڈاکو کہا گیا، چیئرمین نیب کو ویڈیو دکھا کر بلیک میل کرتا رہا لیکن چور، ڈاکو ثابت نہ کرسکا، الزام لگانا آسان لیکن ثابت کرنا مشکل ہوتا ہے، کھسیانی بلی والا منہ لٹکا کر کہتا ہے طاقت ور قانون سے بالاتر ہوتا ہے، جب سے حکومت سے نکلا روز اس کا سکینڈل آتا ہے، نواز شریف نے سی پیک بنایا اس نے جی پیک بنایا، سارا پنجاب کا پیسہ ان کی جیبوں میں گیا، راتوں رات لکھ پتی سے ارب پتی ہوگئے، اس کی آدھی کابینہ امپورٹڈ تھی، جیسے ہی اقتدارگیا اس کی آدھی کابینہ غائب ہوگئی، اس کے امپورٹڈ راتوں رات بھاگ گئے۔
پاکستان مسلم لیگ (ن) کی نائب صدر نے کہا کہ ادارے اس کی انگلی پکڑ کر چلائیں تو اچھے، جس دن ادارے آئین کا ساتھ دیں تو غلط ہوجاتے ہیں، آج الیکشن کمیشن قانون کے تحت چل رہا ہے تو برا ہوگیا، عدالتیں سوموٹولیتی ہیں تو بڑی تکلیف ہوتی ہے، اس نے اسلامی کارڈ بھی کھیلا، اس نے ہم سب پر توہین مذہب کے الزام لگائے، اس نے جھوٹے الزامات لگوا کر احسن اقبال پر گولیاں چلوائیں، کنٹینر پر کھڑے ہوکر آئین شکن کہتا ہے اسلامی ٹچ تو دو، سیاست میں مذہب کو استعمال کرنے والے سے بڑا مجرم کوئی نہیں ہوتا، اپنی جماعت کا نام تحریک انصاف رکھا ہے، نہ تحریک ہے نہ انصاف ہے، اس نے انصاف کے نام پر بڑے بڑے دھبے لگائے ہیں، جسٹس قاضی فائز کو اس نے انتقام کا نشانہ بنایا، عمران خان تمہیں شرم آنی چاہیے نام رکھا ہے تحریک انصاف، نواز شریف کو چورکہا اور اقامہ نکالا، قوم کو ملے ہوئے تحفے بیچ کر کھا گیا اور دندناتا پھر رہا ہے۔
مریم نواز کا کہنا تھا کہ مجھے سزائے موت کی چکی میں رکھا گیا، میرا قصور مظلوم باپ کے ساتھ کھڑے ہونا تھا، سزائے موت کی چکی میں باتھ روم کی دیوار نہیں تھی، جب جیل میں قرآن پاک کے لیے ٹیبل مانگی تو انکار کیا گیا، آج عمران خان کو جوابی ٹویٹ میں کہا کیا سزائے موت کی چکی کی تصویریں بھجوا دوں؟، جب ہم کہتے تھے تاریخ کا پہیہ گھومتا ہے اس وقت تم فرعون بنے پھرتے تھے، اپنی ہار نظر آنے پر کہتا ہے ایکس، وائے، زیڈ ہونے لگا ہے۔
انہوں نے کہا کہ دھاندلی وہ ہوتی ہے جب باپ، بیٹی جیل سے الیکشن لڑے، دھاندلی وہ ہوتی ہے جب ہمارے امیدواروں کو (ن) لیگ کا ٹکٹ چھوڑنے کا کہا جائے، دھاندلی وہ ہوتی ہے جب نواز شریف، مریم کی تقریر پر پابندی لگتی ہے، یہ تو دندناتا پھرتا ہے اور تقریریں کرتا ہے، پنجاب اور تحریک انصاف کے نوجوانوں کو پیغام دیتی ہوں یہ فتنہ بازی کے لیے آپ کو استعمال کر رہا ہے، اس کے اپنے بچے لندن بیٹھے ہیں، ایسا شخص نوجوانوں کا خیرخواہ نہیں ہوسکتا، اس نے نوجوانوں کو ایندھن کی طرح استعمال کیا، ایسا شخص قوم کا ہمدرد نہیں ہوسکتا۔
ان کا کہنا تھا کہ لڑائی جھگڑا نہیں چاہتی، ملک آگے بڑھنا چاہیے، نرم مزاج ہوں لیکن جہاں قوم کی بات آئے گی منہ توڑ جواب دینا آتا ہے، لوگوں کو چور، چور ڈاکو کی گردانیں پڑھاتا رہا، ہم نے تین نسلوں کا جواب دیا، یہ کہتا ہے میرے تحفے میری مرضی، میں تو پنجاب کی ترقی کے لیے ووٹ مانگ رہی ہوں، یہ پنجاب کے سب سے بڑے ڈاکو کے لیے ووٹ مانگ رہا ہے، تحریک انصاف والو شیر کو مت ووٹ دینا لیکن اپنا ووٹ عمران کو دے کر ضائع نہ کرنا، بہت ہوگئی بدتہذیبی خدا کے واسطے ملک کو ترقی کرنے دو، تحریک انصاف کے نوجوانوں کو کہتی ہوں آؤ مریم نواز کا ساتھ دو۔

کراچی: (ویب ڈیسک) وفاقی تحقیقاتی ادارے ( ایف آئی اے) کے امیگریشن سرکل نے کراچی ائیرپورٹ پر جعلی پاکستانی پاسپورٹ پر خلیجی ملک جانے کی کوشش پر ایک افغان باشندے کو گرفتار کرلیا۔
ایف آئی اے حکام کے مطابق کراچی ائیرپورٹ غیرملکیوں کے خلاف امیگریشن کا کریک ڈاؤن جاری ہے۔
حکام نے بتایا کہ جعلی پاکستانی پاسپورٹ کے حامل ایک مشکوک مسافر صادق سے کراچی ائیرپورٹ کے ایف آئی اے امیگریشن کے عملے نے بازپرس کی تو اس کی سفری دستاویزات مشکوک ثابت ہوئیں۔
حکام کا کہنا ہے کہ مسافر پاکستانی جعلی پاسپورٹ پر خلیجی ملک کی پرواز کے ذریعے بیرون ملک کے راستے کسی دوسرے ملک جانا چاہتا تھا۔
حکام کے مطابق افغان شہری کے قبضے سے جعلی پروٹیکٹرز اور جعلی ورک ویزہ بھی قبضے میں لے لیا گیا جبکہ گرفتار مسافر نے افغان شہری ہونے کا اعتراف کرلیا۔
حکام کا کہنا تھاکہ ملزم صادق کے مطابق اس نے اعظم نامی ایجنٹ کو 8 لاکھ روپے دے کر جعلی پاکستانی شناختی کارڈ اور پاسپورٹ کا بندوبست کیا تھا۔
امیگریشن حکام کے مطابق مزید قانونی کارروائی کیلئے مسافر کو ایف آئی اے کے انسداد انسانی اسمگلنگ سیل منتقل کردیا گیا۔