اسلام آباد: (ویب ڈیسک) پاکستان پیپلزپارٹی کے مرکزی رہنما قمرالزماں کائرہ نے کہا ہے کہ خان صاحب نے ہمیشہ لوگوں کو بندوق کی نوک پر رکھا ہے۔
انہوں نے پی پی رہنما فیصل کریم کنڈی کے ہمراہ پریس کانفرنس سے خطاب کرتے ہوئے کہا کہ عمران خان کے ساتھی کہتے ہیں ہم انہیں اسمبلی میں جانے نہیں دیں گے، کہتے ہیں سندھ ہاؤ س میں منڈی لگ گئی ہے۔
انہوں نے کہا کہ عمران خان کی اپنی جماعت کے لوگ انہیں چھوڑ رہے ہیں، کہتے ہیں پیپلزپارٹی ان کے اراکین کو پیسے دے رہی ہے۔ انہوں نے استفسار کیا کہ شہبازشریف وزیراعظم بنیں اور پیسے پیپلزپارٹی دے؟
سابق وفاقی وزیر اطلاعات و نشریات قمرالزماں کائرہ نے کہا کہ 8 تاریخ کو ہم نے درخواست جمع کروائی، 7 دن کے اندر اجلاس بلانا چاہیے تھا جو انہوں نے نہیں بلایا۔
انہوں نے کہا کہ 15 مارچ سے قبل یہ مسئلہ حل ہو جانا چاہیے تھا، حکومت نے 21 مارچ کو اجلاس بلانے کی تجویز دی تھی۔
پی پی کے مرکزی رہنما قمرالزماں کائرہ نے پوچھا کہ آج سارا دن اسمبلی ہال خالی تھا تو اجلاس کیوں نہیں بلایا گیا؟ انہوں نے کہا کہ وزیراعظم نے کہا تھا کہ ووٹنگ سے ایک دن پہلے دس لاکھ لوگ لے کر آئیں گے۔

اسلام آباد: (ویب ڈیسک) وزیر مملکت برائے اطلاعات فرخ حبیب کا کہنا ہے کہ اپوزیشن لوگ اکھٹے نہیں کر سکتی اس لیے آر ہو یا پار یہ بری طرح خوار ہوں گے۔
اپنے ایک ٹوئٹرپیغام میں فرخ حبیب کا کہنا تھا کہ تحریک انصاف کے جلسے کو اپوزیشن خوفزدہ ہوکر رکوانا چاہ رہی تھی کیونکہ ان کو پتہ ہے کہ 27 مارچ کو دس لاکھ لوگ پریڈ گراؤنڈ اسلام آباد میں آجائیں گے۔
انہوں نے کہا کہ اپوزیشن نے بھی لانگ مارچ کی کال دی ہے جس کیلئے ان سے لوگ جمع نہیں ہورہے،آر یا پار والے بری طرح خوار ہوجائیں گے۔

اسلام آباد: (ویب ڈیسک) امریکی سفارت کاروں اور نیشنل ہائی ویز اینڈ موٹر وے پولیس (این ایچ ایم پی) کے انسپکٹر جنرل انعام غنی نے مل کر شیخوپورہ کے این ایچ ایم پی ٹریننگ کالج میں 100 خواتین پولیس عہدیداروں کے لئے ایک نئی بیرک سہولت کا افتتاح کیا۔ اقوام متحدہ کے دفتر برائے پروجیکٹ سروسز (یو این او پی ایس) کی جانب سے تعمیر کی گئی یہ سہولت پاکستان میں این ایچ ایم پی اور امریکی مشن کے درمیان شراکت داری سے معرض وجود میں آئی۔
اسلام آباد کے ڈائریکٹر آف انٹرنیشنل نارکوٹکس اینڈ لا انفورسمنٹ (آئی این ایل) افیئرز مارک ٹیرواکوسکی نے کہا کہ اس سہولت سے این ایچ ایم پی کو نئی بھرتی ہونے والی خواتین کو رہائش دینے میں مدد ملے گی اور جیسے جیسے زیادہ پاکستانی خواتین افسران کی صف میں شامل ہوں گی، وہ لازمی طور پر صنفی مسائل کے بارے میں پولیس کی تفہیم کو وسیع کریں گی اور سب اور خاص طور پر خواتین کو پیش کی جانے والی خدمات کے معیار میں اضافہ کریں گی۔
یو این او پی ایس پاکستان کی کنٹری منیجر میریسیا زپاسنک نے کہا کہ سماجی روایتوں کی وجہ سے خواتین کے لیے کچھ عرصہ قبل تک پولیس میں شامل ہونا مشکل تھا: ہم سمجھتے ہیں کہ اس تعصب کو توڑنا خواتین کی مساوات کو استوار کرنے اور امتیازی سلوک کو ختم کرنے کے لیے بنیاد کا درجہ رکھتا ہے۔ ہمارے منصوبے خواتین پولیس افسران کے لئے بنیادی ڈھانچہ تعمیر کرتے ہیں تاکہ زیادہ سے زیادہ خواتین پولیس کے پیشے میں شامل ہو سکیں، دقیانوسی تصورات کو توڑ سکیں، دیگر خواتین کے لئے رول ماڈل بن سکیں اور پاکستان کے عوام کو بہتر اور زیادہ جامع خدمات فراہم کر سکیں۔
اس سال آئی این ایل کے ذریعے، امریکی مشن اور پاکستان کے درمیان “انصاف، سلامتی اور خوشحالی” کے جھنڈے تلے شراکت داری کی 40ویں سالگرہ منائی جا رہی ہے جس میں پاکستان بھر میں شہریوں کی سلامتی کو بہتر بنانے اور قانون نافذ کرنے کی صلاحیت بڑھانے کے لئے چار دہائیوں پر محیط کوششیں کی گئی ہیں۔ ان کاوشوں میں خواتین کی نئی بیرکوں کی تعمیر کے لئے درکار فنڈز میں حصہ ڈالنا بھی شامل ہے۔ اسی طرح اس سال امریکہ اور پاکستان کے تعلقات کی 75ویں سالگرہ ہے اور آئی این ایل کےتعاون کی طویل تاریخ ہمارے دونوں ممالک کے تعلقات کی گہرائی اور وسعت کی ایک اور مثال ہے۔
امریکی محکمہ خارجہ کا بیورو آف انٹرنیشنل نارکوٹکس اینڈ لا انفورسمنٹ افیئرز جرائم اور بدعنوانی سے نمٹنے میں مدد کے لیے 90 سے زائد ممالک کے ساتھ شراکت دار ہے۔ منشیات کی تجارت کا خاتمہ، پولیس کو بہتر بنانا، اور منصفانہ عدالتی نظام کو فروغ دینا اس شراکت کی شکلیں ہیں۔