پاکستان میں 10 کروڑ ڈالر کے آن لائن فراڈ کے معاملے پر بڑا بریک تھرو، بائنانس کا ایف آئی اے سائبرکرائم ونگ سے رابطہ، تفتیش میں معاونت کے لیے 2 رکنی ٹیم بھی تشکیل دے دی، جعلسازی میں ملوث 11 مختلف کمپنیز بائنانس بلاک چین استعمال کر رہی تھیں۔ ایڈیشنل ڈائریکٹر ایف آئی اے سائبر کرائم ونگ عمران ریاض کے مطابق جعلسازی میں ملوث 11 مختلف کمپنیز بائنانس بلاک چین استعمال کر رہی تھیں۔ ایف آئی اے سے رابطے کے لیے بائنانس نے 2 رکنی ماہر تفتیشی ٹیم بھی تشکیل دے دی۔ ایف آئی اے حکام کا کہنا ہے کہ رابطہ ہونے کے بعد بائنانس سے ای میلز پر بات چیت بھی کی گئی۔ ایف آئی اے کو آن لائن کرپٹو کرنسی میں فراڈ کی شکایت ملیں تھیں، ایف آئی اے کا کہنا تھا کہ رقم کرپٹو کرنسی کے ذریعے منی لانڈرنگ اور دیگر مقاصد میں استعمال ہو رہی ہے، جس پر ایف آئی اے نے چند روز قبل تفتیش شروع کی تھی۔ متاثرہ افراد نے 100 ڈالر سے 80 ہزار ڈالر تک سرمایہ کاری کی تھی۔ اب تک ایف آئی اے درجنوں متاثرین کے بیانات ریکارڈ کر چکا ہے۔

ہوٹل ایسوسی ایشن کے رہنماؤں نے کہا ہے کہ سانحہ مری میں ہوٹلوں کو بدنام کرنا سازش ہے۔ مری ہوٹل ایسوسی ایشنز کے رہنماؤں نے اسلام آباد میں پریس کانفرنس کرتے ہوئے کہا کہ مری میں انسانی جانوں کا ضیاع انتظامیہ کی نا اہلی ہے اور مری ہائی وے ڈیپارٹمنٹ کے پاس ڈیزل ہی نہیں تھا۔ مری ہوٹل ایسوسی ایشن نے سانحہ مری پر جوڈیشل کمیشن بنانے کا مطالبہ کر دیا۔ انہوں نے کہا کہ 72 گھنٹے بعد بھی مری کو آفت زدہ علاقہ قرار دینے کا نوٹیفکیشن واپس نہیں لیا گیا جبکہ مری میں داخل ہونے والی گاڑیوں کی اعداد و شمار بھی غلط بتائے گئے۔ ہوٹل ایسوسی ایشن کے رہنماؤں نے کہا کہ ہم نے 50 یا 70 ہزار کرایہ لیا نہ لوگوں کے زیورات گروی رکھے۔ ہوٹل کے کمرے کا 70 ہزار کرایہ دینے والے ہوٹل سے پکی رسید کیوں نہیں مانگتے ؟ چھوٹے موٹے واقعات اہلیان مری کے ساتھ نہ جوڑے جائیں۔ انہوں نے کہا کہ اہلیان مری نے اپنی روایات کو زندہ رکھا اور سیاحوں کی مدد کے لیے پہنچے۔ مقامی افراد نے سیاحوں کو گھروں میں رکھا اور ہوٹلز میں کمرے فری کر دیئے گئے تھے جبکہ مری میں تمام سیاسی و مذہبی تنظیموں نے کام کیا۔ ایسوسی ایشن رہنماؤں نے کہا کہ ایک خاتون نے کہا میرے زیور گروی رکھے گئے اور تب کمرہ دیا گیا۔ ثبوتوں کے ساتھ آئیں اور اگر کسی ہوٹل نے 70 ہزار روپے کرایہ ایک دن کا چارج کیا ہو گا یا زیور گروی رکھوائے گئے ہوں گے تو ہم اس کی رکنیت ختم کریں گے لیکن کسی غلط کام کو سپورٹ نہیں کریں گے۔ انہوں نے کہا کہ مری پاکستان میں ہے اور ہماری بھی کچھ روایات ہیں، اس برفباری میں کوئی ایک آدمی نہیں کہہ سکتا کہ میرا زیور یا پرس چوری ہو گیا۔ مری کے لوگوں کا مثبت چہرہ دیکھنا چاہئے۔

چیئرمین پیپلز پارٹی بلاول بھٹو زرداری نے کہا ہے کہ عمران خان نے زراعت کو تباہ کر کے معاشی دہشتگردی کی۔ چیئرمین پیپلز پارٹی بلاول بھٹو زرداری نے میڈیا سے گفتگو میں کہا کہ عمران خان ہوش کے ناخن لیں، اس وقت ملک میں یوریا بحران بھی سنگین صورت حال اختیار کر چکا ہے اور مارکیٹ میں یوریا کی بوری 3 ہزار 500 روپے بلیک میں فروخت ہو رہی ہے۔ انہوں نے کہا کہ پیپلز پارٹی کے دور میں پاکستان پوری دنیا میں یوریا فروخت کرتا تھا اور آج ملک میں یوریا ڈھونڈنا پڑ رہا ہے۔ برسات سے قبل کاشتکاروں کو یوریا میسر آجاتا تو فصلوں کی پیداوار میں ریکارڈ اضافہ ہوتا۔ بلاول بھٹو زرداری نے کہا کہ پیپلز پارٹی کسانوں کے ساتھ ہونے والے ظلم کے خلاف 21 جنوری سے ریلیاں نکالے گی اور پیپلز پارٹی کے کسان یکجہتی احتجاج میں ملک بھر کے کسان نکلیں گے اور ہم حکومت سے اپنے مطالبات منوائیں گے۔ انہوں نے کہا کہ عمران خان نے ملکی زراعت کو تباہ کر کے معاشی دہشتگردی کی ہے۔ گندم کی بوائی کے سیزن سے ڈی اے پی کھاد 10 ہزار روپے بوری فروخت ہو رہی ہے جبکہ پیپلز پارٹی کے دور میں ڈی اے پی کھاد کی فی بوری 3500 روپے تک تھی۔ چیئرمین پیپلز پارٹی نے کہا کہ پنجاب میں کسانوں کو نہری پانی نہیں مل رہا اور ٹیوب ویل چلا کر سرکاری قیمت پر گندم کی فروخت ممکن نہیں ہو گی اور اسی لیے سندھ حکومت نے گندم کی امدادی قیمت 2200 روپے رکھی۔ انہوں نے کہا کہ ڈیزل، بجلی اور کیڑے مار ادویات کی قیمتوں میں اضافے سے گندم کی فی ایکڑ لاگت بڑھ گئی ہے اور پنجاب میں بھی گندم کی امدادی قیمت میں اضافہ کیا جائے۔

جسٹس عمر عطا بندیال 2 فروری کو چیف جسٹس آف پاکستان کا حلف اٹھائیں گے، موجودہ چیف جسٹس گلزار احمد یکم فروری کو ریٹائرڈ ہو جائیں گے۔ وزارت قانون نے نئے چیف جسٹس تعیناتی سمری پر کام شروع کر دیا۔ وزارت قانون سمری تیار کرکے صدر مملکت کو بھجوائے گی، صدر مملکت کی منظوری کے بعد وزارت قانون چیف جسٹس آف پاکستان کا نوٹی فیکیشن جاری کرے گا۔ آئین کے مطابق سینئر موسٹ جج کو چیف جسٹس آف پاکستان بنایا جاتا ہے۔ جسٹس عمر عطا بندیال سپریم کورٹ سینئر ترین جج ہیں، جسٹس عمر عطا بندیال 16 ستمبر 2023 تک چیف جسٹس کے منصب پر فائز رہیں گے۔ خیال رہے سپریم کورٹ کے جج کی ریٹائرمنٹ کی عمر 65سال مقرر ہے، چیف جسٹس کی ریٹائرمنٹ کے بعد سینئر ترین جج کو چیف جسٹس کا عہدہ تفویض کیا جاتا ہے ، جسٹس عمر عطا بندیال سپریم کورٹ سینئر ترین جج ہیں۔ جسٹس بندیال 18 ستمبر 2023 کو ریٹائر ہونے تک چیف جسٹس کے عہدے پر برقرار رہیں گے۔