بہتر ہے کہ پاکستانی اداکار بھارت چھوڑ دیں

ممبئی(شوبز ڈیسک)بولی وڈ اداکار نوازالدین صدیقی کا کہنا ہے کہ ایسے میں جبکہ ہندوستان اور پاکستان کے درمیان حالات کشیدہ ہیں تو بہتر ہے کہ پاکستانی فنکار ہندوستان چھوڑ کر چلے جائیں۔ٹائمز آف انڈیا کی ایک رپورٹ کے مطابق ایک پریس کانفرنس کے دوران نوازالدین صدیقی سے پاکستانی فنکاروں کے حوالے سے سوال کیا گیا تھا جس پر ان کا یہ ردعمل سامنے آیا۔دلچسپ بات یہ ہے کہ نوازالدین صدیقی نے گزشتہ سال ریلیز ہونے والی اپنی فلم ’بجرنگی بھائی جان‘ میں ایک پاکستانی رپورٹر ‘چاند نواب’ کا کردار نبھایا تھا۔ جس میں وہ فلم کے مرکزی کردار سلمان خان کے ساتھ ایک پاکستانی بچی کو اس کے گھر تک بحفاظت پہنچانے کا ذمہ اٹھاتے ہیں۔تاہم آرٹ کو فروغ دینے والے ایک اداکار کا پاکستانی فنکاروں کے حوالے سے یہ بیان کافی غیر متوقع ہے۔