چیئرمین CDA کا مارگلہ ایونیو N5 تا M1 توسیع منصوبے کا دورہ

اسلام آباد(پ ر)چیئرمین کیپیٹل ڈویلپمنٹ اتھارٹی(سی ڈی اے) و چیف کمشنر اسلام آباد سہیل اشرف نے متعلقہ سنئیر افسران کے ہمراہ مارگلہ ایونیو N5 تا M1 توسیع (ایکسٹینشن) و سنگجانی انٹرچینج منصوبے کا دورہ کیا اور منصوبے کے مختلف سیکشنز کا تفصیلی جائزہ و معائنہ کیا۔چیئرمین سی ڈی اے سہیل اشرف کو بریفنگ دیتے ہوئے بتایا
گیا کہ منصوبے کے مختلف سیکشنز پر 24/7 تعمیراتی سرگرمیاں روزانہ کی بنیاد پر بھرپور طریقے سے جاری ہیں اور مجموعی طور پر ابتک اس منصوبے کے 36 فیصد ترقیاتی کاموں کو مکمل کر لیا گیا ہے۔بریفنگ دیتے ہوئے چیئرمین سی ڈی اے کو بتایا گیا کہ اس منصوبے میں مرکزی شاہراہ کی توسیع (ایکسٹینشن) تقریبا 2.7 کلومیٹر لمبائی کے تمام سیکشنز پر تیزی سے کام جاری ہے جبکہ مرکزی شاہراہ سے منسلک سروس روڈ پر بھی کام کیا جارہا ہے۔بریفنگ دیتے ہوئے بتایا گیا کہ سنگجانی انٹرچینج منصوبے میں شامل انڈر پاس کے سٹرکچرل ورک کو مکمل کر لیا گیا ہے اور انڈر پاس کی کنکریٹ والز اور فوٹنگ سیلبس کا کام بھی مکمل کرلیا گیا ہے جبکہ ارتھ ورک، فلنگ ورک سمیت دیگر باقی ماندہ کاموں کو بھی جلد ہی مکمل کرلیا جائیگا۔بریفنگ دیتے ہوئے بتایا گیا کہ اسی طرح این فائیو انٹرچینج بریج پر دونوں اطراف ابیٹمنٹس کا پائل ورک مکمل کرلیا گیا ہے جبکہ سٹیل فکسنگ اور فریم ورک کا کام تیزی کیساتھ جاری ہے۔ اسی طرح اس منصوبے میں شامل چار کلورٹس کا کام مکمل کر لیا گیا جبکہ ایک کلورٹس پر کام جاری ہے۔ انہیں مزید بتایا گیا کہ منصوبے میں شامل تمام لوپس اور ریمپس پر بھی دن رات تیزی سے کام کیا جارہا ہے۔چیئرمین سی ڈی اے سہیل اشرف نے منصوبے کو مقررہ مدت میں مکمل کرنے کیلئے تمام حائل رکاوٹوں کو دور کرنے کی ہدایت کرتے ہوئے کہا کہ منصوبے کے تعمیراتی کاموں میں معیار کیساتھ رفتار اور شفافیت کا خاص خیال رکھا جائے۔چیئرمین سی ڈی اے سہیل اشرف نے کہا کہ منصوبے کی تکمیل سے اندرون و بیرون شہر سفر کرنے بالخصوص خیبر پختونخوا سے آنے والے شہریوں کو اسلام آباد تک آسانی سے رسائی حاصل ہوگی اسی طرح دیگر شہروں سے آنے والوں کیلئے بھی یہ منصوبہ ایک گیٹ وے ثابت ہوگا۔ انہوں نے مزید کہا کہ اس منصوبے سے اسلام آباد انٹرنیشنل ایئرپورٹ تک رسائی بھی بہتر ہوگی۔