لاہور/بہاولپور( اے این این، آن لائن ) عوامی مسلم لیگ کے سربراہ شیخ رشید احمد نے عمران خان کی قیادت میں ایک بارپھر دھرنا دینے کاعندیہ دیتے ہوئے کہاہے کہ جس عمرمیں نوازشریف کے بچے ارب پتی بن گئے اس عمر میں تو ہمارے بچوں کاشناختی کارڈ نہیں بنتا ، پاناما کا فیصلہ اسی ماہ آجائے گا، سپریم کورٹ کرپشن کےخلاف دیوار چین ہے، احتساب کا پرچم عدالت عظمیٰ سے ہی بلند ہوگا، ایک آدمی بھی گرفتار ہوا تو لائن لگ جائے گی،کوئی کچھ بھی کر لے نوازشریف 2018 میں نہیں ہوں گے ،میرا وقت آیا تو ایاز صادق کی بولتی بند کردوں گا،آصف زرداری بلاول پر بھاری نہ ہوتے تو اپوزیشن کا گرینڈ الائنس بن سکتا تھا۔ان خیالات کااظہارانہوں نے بہاولپور میں تحریک انصاف کے جلسے سے خطاب اوراس سے پہلے لاہور میں میڈیا سے گفتگو کرتے ہوئے کیا۔جلسے سے خطاب میں شیخ رشید نے کہاکہ نوازشریف انڈر19کھیلنے کے عادی ہیں، جس عمر میں نواز شریف کے بچے ارب پتی بن گئے اس عمر میں ہمارے بچوں کا شناختی کارڈ نہیں بنتا تاہم پاناما کیس نواز شریف کو انجام تک پہنچائے گا، سیف الرحمان اور قطری شہزادہ دونوں ایک ہیں کیونکہ قطری شہزادہ ہیلی کاپٹر کیس میں بھی آیا تھا۔ انہوں نے کہاکہ عمران خان کی قیادت میں ایک دھرنا اور دیں گے جب کہ میرا وقت آیا تو ایاز صادق کی بولتی بند کردوں گا، اپنا تابوت اپنے کندھے پر اٹھائے پھر تا ہوں تاہم کوشش کریں گے سیاسی تابوت سپریم کورٹ سے نکلے جب کہ اتفاق اسپتال میں مولانا کاپتہ نکال دیا گیاہے ۔ بہاولپور روانگی سے قبل لاہور میں میڈیا سے گفتگو کرتے ہو ئے انہوں نے کہا کہ حکومت روز ایک ارب 30 کروڑ کے نوٹ روزچھاپ رہی ہے اور نواز حکومت نے ملکی قرضے میں 900 ارب روپے کا اضافہ کر دیا ہے، ملک میں کرپشن کا راج ہے، یہاں کرپشن نہ ہو تو ہر سال نیا سی پیک بن سکتا ہے۔ شیخ رشید نے ایک بار پھردھرنے کا اشارہ دیتے ہوئے کہا کہ اگر ضرورت پڑی توایک اور دھرنا دیں گے جس کے لیے قوم تیار رہے اور پی ٹی آئی کے بعد ہم سپریم کورٹ میں اپنا موقف پیش کریں گے۔شیخ رشید نے کہا کہ پاناما لیکس کیس میں ن لیگ نے جعلی دستاویزات پیش کی ہیں لیکن سپریم کورٹ کرپشن کے خلاف دیوار ِچین ہے، عدالت عظمی سے ہی احتساب کا پرچم بلند ہوگا، کوئی کچھ بھی کر لے نوازشریف 2018میں نہیں ہوں گے اور پاناما کا فیصلہ بھی اسی ماہ جنوری میں آجائے گا۔ اپوزیشن کے گرینڈ الائنس کے حوالے سے ان کا کہنا تھا کہ اگر آصف زرداری بلاول پر بھاری نہ ہوتے تواپوزیشن کا گرینڈ الائنس بن جاتا، جس پارلیمنٹ کا اسپیکر ایاز صادق جیسا شخص ہو اس سے کیا توقع رکھی جا سکتی ہے۔شیخ رشید نے کہا کہ ملک تیزی سے زوال کی طرف جارہا ہے، کرپشن کے نئے نئے پروگرام بن رہے ہیں، یہ سب چور قوم پر بوجھ ہیں، انہوں نے فیصلہ کرلیا ہے کہ قوم کی لوٹی ہوئی دولت باہر ملک لے کر جانا ہے۔ ان کا کہنا تھا کہ جمہوریت ترقی کا واحد حل ہے لیکن اگر یہ سارے چور ایک ساتھ اکھٹے ہوگئے تو عوام کو چوراہوں کے علاوہ کوئی راستہ نہ ملے گا۔شیخ رشید کا کہنا تھا کہ انصاف کا جھنڈا لاہورسے بلند ہوگا جب کہ کرپشن میں ایک آدمی بھی گرفتار ہوا تو کرپشن والوں کی لائن لگ جائے گی۔ شیخ رشید نے کوئلہ پلانٹ کے حوالے سے کہا کہ ساہیوال کوئلہ پلانٹ انسانی جانوں کےلئے نقصان دہ ہے، پلانٹ سے لوگ چین میں مر رہے ہیں اورساہیوال پلانٹ سے بھی لوگوں کے منہ کالے ہوں گے۔ دریں اثناءایک ٹی وی انٹرویومیں شیخ رشید نے کہاکہ پی پی اور مسلم لیگ ایک دوسرے کو بچانے میں لگیں ہوئے ہیں جب سیاست دان اپوزیشن میں ہوتے ہیں تو ایک دوسرے پر کڑی تنقید کر تے ہیں اور جب اقتدار کے نشے میں اندھے ہو جاتے ہیں تو چور ، چور کا تحفظ کرنے لگ جاتا ہے نواز شریف اور زرداری کب چاہیں گے کہ وہ ایک دوسرے کو پکڑیں،پہلی انکوائری پانامہ لیکس پھر عوامی مسلم لیگ عوام میں جائے گی پھر اس کا حتمی فیصلہ عوام ہی کرے گی کہ اس کے حق میں کون ہے قانون کے دائرے میں سب برابر ہیں سب کا احتساب ضروری ہے ان اقتدار کے اندھے حکمرانو ں نے باریا ں بانٹی ہو ئی ہیں۔انہوں نے کہاکہ جاوید ہاشمی اور عمران خان کے اپنے معاملات ہیں یہ دونو ں ایک دوسرے پر الزامات لگاتے رہیں میں اس بارے کچھ نہیں کہوں گا پہلے عمران خان جاوید ہاشمی کو منہ نہ لگاتے نہ ہی آج خان کو شرمندگی کا سامنا کرنا پڑتا جب جاوید ہاشمی پر عمران خان میں ایسی باتیں ہوئیں تو میں اس وقت ان کے درمیان موجود نہ تھا یہ انکا انفرادی معاملہ ہے ۔ شیخ رشید نے کہا کہ وفاقی وزیر ریلوے بے حس ہو چکے ہیں وہ ادارے کو کنٹرول کرنے میں نا کام ہو چکے ہیں اس ملک میں قانون نام کی کوئی چیز نہیں ادارے اور سسٹم بالکل مفلوج ہو چکے ہیں ملک کے کئی علاقو ں میں نہ ہی ریلوے پھاٹک سگنل سسٹم کچھ بھی نہیں ہیں حکومت کو چاہیے کہ ریلوے میں پھاٹک کے معاملے میں ملازمین کی ڈیوٹی پانچ گھنٹے کر دی جائے تاکہ جو نوجوان ہاتھو ںمیں ڈگریا ںلئے مارے مارے پھر رہے ہیں انکو بھرتی کیا جائے ۔
خود کش سیاستدان …. اہم انکشاف سے مقتدر حلقوں میں کھلبلی
