اسلام آباد (مانیٹرنگ ڈیسک) سابق چیف جسٹس افتخار چودھری نے کہا ہے کہ پانامہ فیصلہ میں پانچوں ججز نے ثابت کر دیا کہ وزیراعظم ایماندار نہیں ہیں، دو ججز صاحبان نے وزیراعظم کو نااہلی کا سرٹیفکیٹ دینے کا بہت بڑا فیصلہ آیا ہے۔ جے آئی ٹی ہمیشہ ملزم کے لئے بنائی جاتی ہے۔ نوازشریف بطور ملزم جے آئی ٹی کے سامنے پیش ہوں گے تو پارلیمنٹ کی بالادستی کیسے قائم رہے گی۔ جے آئی ٹی میں تو اجمل پہاڑی اور کامران مادھوری جیسے قاتل پیش ہوتے ہیں۔ وزیراعظم صاحب آپ کس کے برابر کھڑے ہو گئے ہیں۔ نجی ٹی وی سے خصوصی بات چیت کرتے ہوئے افتخار چودھری نے کہا کہ نوازشریف کو جے آئی ٹی کے سامنے بھجوانے کا مقصد تفصیلی تحقیقات ہیں۔ ہر جج نے اپنا الگ الگ نوٹ لکھا ہے جو بہت اہم ہے، عدالت نے کہا ہے کہ نوازشریف اس قابل نہیں کہ ممبر اسمبلی رہ سکیں۔ سپریم کورٹ نے ثابت کر دیا ہے کہ وزیراعظم قانون سے بالاتر نہیں ہیں۔
