لاہور(خصوصی رپورٹ) پنجاب حکومت نے مزدوروں کی تنخواہ میں ایک ہزارروپے کا اضافہ کرتے ہوئے کم از کم تنخواہ 15 ہزار روپے مقرر کرنے کا فیصلہ کیا ہے جس اک اعلان وزیراعلیٰ پنجاب یکم مئی (لیبرڈے) کو کریں گے۔ مزدوروں کے عالمی دن کے موقع پر وزیراعلیٰ پنجاب کی جانب سے مزدوروں کے لیے چند اور بھی اعلانات متوقع ہیں جس سے مزدوروں کی زندگی میں بہتری آئے گی۔ ذرائع کے مطابق وزیراعلیٰ پنجاب نے محکمہ لیبر سے یکم مئی کے حوالے سے تجاویز طلب کی تھیں اور مزدوروں کے مسائل پر بھی محکمہ کی رائے مانگی تھی جس پر محکمہ نے انہیں آگاہ کیا کہ مزدوروں کے ہزاروں ڈیتھ گرانٹس، میرج گرانٹس اور سکالرشپ کے کیس التوا کا شکار ہیں۔ ان کیسز کو نمٹانے کیلئے کروڑوں روپے درکار ہیں لیکن فنڈز کی کمی کے باعث ان مزدوروں کو نہ تو ڈیتھ گرانٹس کی رقم مل پا رہی ہے اور نہ ہی میرج گرانٹس کا اجرا ہو پا رہا ہے اس کے علاوہ پنجاب بھر کے مزدوروں کے بچے سکالرشپ سے محروم ہیں۔ ذرائع کا کہنا ہے کہ اس بات کا قوی امکان ہے کہ وزیراعلیٰ پنجاب یکم مئی کو یہ اعلان کردیں کہ مزدوروں کے جتنے بھی ڈیتھ اور میرج گرانٹس کے کیسز زیرالتوا ہیں انکو 30 مئی تک کلیئر کیا جائے اور مستحق مزدوروں کو رقم جاری کردی جائیں جبکہ جن بچوں کے سکالرشپ التوا کا شکار ہیں انہیں بھی سکالرشپ دیئے جائیں۔
