کراچی(ویب ڈیسک)کراچی میں خیبرپختونخوا میں تعینات ڈی آئی جی پشاور کے بیٹے کے قتل کی تحقیقات میں پیش رفت ہوئی ہے۔ملزم فقیرمحمد نے قتل کے لئے رسی اور دستانے پہلے سے خرید رکھے تھے۔ذرائع کے مطابق ملزم نے مقتول عمیرشہاب کی والدہ کوبھی قتل کرنے کی کوشش کی۔ڈی آئی جی کی اہلیہ کے کمرے کے سوئچ بورڈ پر خون کے نشان ہیں۔ایس پی کلفٹن اسد ملہی نے مقتول کے دیگر اہلخانہ پرقاتلانہ حملے کی تردید کی ہے۔پولیس نے ملزم کو گرفتار کر کے آلہ قتل قبضے میں لے لیا۔قتل کی مزید تحقیقات جاری ہیں۔تحقیقاتی ذرائع کے مطابق ملزم فقیر محمد چھ ماہ کے لیے ڈی آئی جی پشاور کے بنگلے پر تعینات ہوا تھا۔گزشتہ شب فقیر محمد کی آخری ڈیوٹی تھی، صبح اسے کشمور روانہ ہوجانا تھا۔ واردات رات 12بجے کے بعد ہوئی ہے۔
اس سے قبل….
کراچی(ویب ڈیسک) کراچی میں ڈی آئی جی پشاور شہاب مظہر کا بیٹا عمر شہاب اپنے ہی محافظ کے ہاتھوں قتل ہو گیا،پولیس کا کہنا ہے کہ ملزم فقیر محمد نے دو لاکھ روپے کا تقا ضا کیا تھا،انکار پر عمر شہاب کو قتل کر دیا،ملزم نے اعتراف جرم بھی کر لیا ہے۔تفصیلات کے مطابق کراچی کے پوش علاقے ڈیفنس خیابان سحر کے ایک بنگلے سے 27 سالہ عمر شہاب کی لاش ملی،عمر شہاب ڈی آئی جی پشاور مظہر شہاب کا بیٹا تھا،پولیس نےعمر شہاب کے محافظ فقیر محمد کو حراست میں لے کر پوچھ گچھ کی تو اس نے سارا قصہ اگل دیا۔پولیس کے مطابق ملزم فقیر محمد نے عمر شہاب سے 2 لاکھ روپے کا تقاضہ کیا،عمر شہاب نے رقم دینے سے انکار کیا تو دونوں میں لڑائی ہو گئی،ملزم فقیر محمد نے عمر شہاب کے گلے میں رسی ڈال کر گلا گھونٹ کر قتل کر دیا،ملزم کو تھانہ درخشان منتقل کر دیا گیا ہے جہاں اس سے مزید تفتیش کی جا رہی ہے۔
