لاہور (خصوصی رپورٹ) ڈریپ اور ادویات ساز کمپنیوں کی ملی بھگت سے 900سے زائد ادویات کی قیمتوں میں 25سے 30فیصد تک اضافے کا امکان ہے جس کے باعث غریب مریضوں کیلئے ادویات خریدنا مزید مشکل ہو جائے گا۔ ذرائع کے مطابق ملٹی نیشنل کمپنیوں نے 2مئی کو ہونے والی ڈرگ پرائسنگ کمیٹی کی میٹنگ میں ادویات کی قیمتوں میں اضافہ کروانے کیلئے تمام معاملات کو حتمی شکل دے دی ہے۔ جن ادویات کی قیمتوں میں اضافہ متوقع ہے ان میں دمہ کے امراض‘ ہیپاٹائٹس‘ دل کے امراض‘ بلڈ پریشر‘ پیٹ کے درد اور بچوں کے دست کے امراض شامل ہیں۔ ڈرگ پرائسنگ کمیٹی کی میٹنگ میں وفاقی سیکرٹری ہیلتھ سمیت پنجاب‘ بلوچستان‘ کے پی کے‘ سندھ‘ گلگت بلتسان‘ آزادکشمیر کے چیف ڈرگ انسپکٹرز‘ ملٹی نیشنل فارما بیورو‘ پاکستان میڈیکل ایسوسی ایشن‘ پاکستان کیمسٹ اینڈ ڈرگسٹ ایسوسی ایشن اور دیگر تنظمیوں کے نمائندے شرکت کریں گے۔ ادویات کی قیمتوں میں اضافہ کے حوالے سے معروف قانون دان اور فارماسسٹ نور محمد مہر کا کہنا ہے کہ ڈریپ کی ملی بھگت سے عوام کی جیبوں پر ڈاکہ ڈالا جا رہا ہے اور جس میں مزید اضافے سے عوام کی مشکلات میں اضافہ ہو جائے گا۔ پاکستان ملٹی نیشنل اور نیشنل کمپنیوں نے 50ارب روپے کی کرپشن کی ہے جس میں سے نیب نے صرف ایک ارب پانچ کروڑ کی رقم پلی بارگیننگ کے تحت وصول کی ہے۔ جن کمپنیوں سے رقم وصول کئی گئی ان کی تعداد 6ہے۔ ڈریپ کی ملی بھگت سے جن 50کمپنیوں نے از خود 15فیصد اضافہ کر لیا تھا وہ بھی تاحال واپس نہیں ہو سکا۔
ادویاتٰ
