اسلام آباد(ویب ڈیسک) مسلم لیگ (ن) کے رہنما حنیف عباسی کا کہنا ہے کہ نواز شریف کو عوام نے منتخب کیا ہے اور وہی ان سے استعفیٰ لے سکتے ہیں اس کے علاوہ کوئی بھی مائی کا لعل وزیراعظم سے زبردستی استعفیٰ نہیں لے سکتا۔راولپنڈی میں مسلم لیگ (ن) کے رہنماو¿ں کے ہمراہ پریس کانفرنس کرتے ہوئے سابق رکن قومی اسمبلی حنیف عباسی کا کہنا تھا کہ کہ پیپلزپارٹی کے رہنما مولا بخش نے آج حیدرآباد میں وزیراعظم نوازشریف سے مستعفی ہونے کی مطالبہ کیا اور ایان علی کا مسلم لیگ (ن) کے رہنماو¿ں سے رشتہ پوچھا ہے تو میں حلفیہ بیان دیتا ہوں کہ ہمارا اور ہماری قیادت کا ماڈل ایان علی سے کوئی رشتہ نہیں، رشتہ اس کا ہے جس نے لطیف کھوسہ کو ایان علی کا وکیل بنوایا اور جس نے ایان کو دبئی میں فلیٹ لے کر دیا۔ چانڈیو صاحب میڈیا پر آکر کہہ دیں کہ ایان علی آصف علی زرداری کی بہن ہیں، اگر وہ یہ بات مان لیں تو میں ان کو پوری قوم کے سامنے سیلیوٹ پیش کروں گا۔
حنیف عباسی کا کہنا تھا کہ مولابخش چانڈیو ایک سند یافتہ چور آصف زرداری کے لئے بات کرتے ہیں، آصف زرداری نے پہلے کہا کہ سرے محل میرا نہیں اور بعد میں اس کا مالک بن کر بیچ دیا، انہوں نے لاڑکانہ کے 80 ارب روپے کھا لئے، آصف زرداری نے 6 ارب روپے سوئس بینکوں میں جمع کرا رکھے ہیں، یہ ہماری حکومت کی کمزوری تھی کہ آصف زرداری کو چھوڑ دیا، حکومت تمام پیسے پاکستان لے کر آتی اور انہیں جیل میں بند کردیتی۔ ان کا کہنا تھا کہ مولا بخش اس پیپلزپارٹی کی بات کرتے ہیں جس نے کراچی کو کچرا کنڈی میں تبدیل کردیا، سندھ کے عوام اور وزرا پنجاب آئیں اور ہر شہر میں گھوم کر دیکھیں، جب وہ پنجاب کے شہروں کو دیکھ کر کراچی اور لاڑکانہ کا موازنہ کریں گے تو انہیں احساس محرومی ضرور ہو گا۔
حنیف عباسی کا کہنا تھا کہ شیخ رشید نوازشریف کے بارے میں فیل اور پاس ہونے کے بیانات دیتے ہیں، کیا پدی اور کیا پدی کا شوربہ، شیخ رشید کے خلاف ایک 2 روز میں کچھ لوگ پریس کانفرنس کرنے والے ہیں جنہوں نے ان کی جگہ پیپرز دیئے تھے اور وہ تمام حقائق سامنے لائیں گے کہ شیخ رشید کتنی بار میٹرک اور انٹر میں فیل ہوئے ہیں۔ ان کا کہنا تھا کہ شیخ رشید آج اپنے محسن کے خلاف بیانات دیتے ہیں، انہیں یاد نہیں کہ وہ نوازشریف کے قدموں میں بیٹھ کر وزارت کی بھیک مانگتے تھے اور 2013 میں بھی مجھ سے مل کر کہا کہ مجھے معافی دے دی جائے اور (ن) لیگ میں شامل کرلیا جائے، جب نوازشریف نے انہیں گھاس نہیں ڈالی تو ان کا اصل چہرہ بے نقاب ہو گیا اور ان کی اوقات بھی سامنے آگئی جسے شہر کے عوام اچھی طرح جانتے ہیں۔ ان کا کہنا تھا کہ شیخ رشید نے کہا تھا کہ میرے خلاف انتخابات میں حصہ نہ لو لیکن الیکشن کے بعد شیخ رشید کی ضمانت بھی ضبط ہو گئی، 2013 کا الیکشن اپنے دوستوں کی مدد سے جیتنے والے شیخ رشید آج دیکھ لیں کہ لوکل باڈی الیکشن میں راولپنڈی کی 48 سیٹوں میں سے 40 سیٹیں (ن) لیگ نے جیت لی ہیں۔
