خبریں ہیلپ لائن ان ایکشن ، ایک اور مکرو چہرہ بے نقاب

خیرپورڈاہا (محمد آصف رضا سے) 3 ماہ قبل زبردستی زیادتی کر کے حاملہ کر دینے والا ظالم ملزم پولیس کی آشیرباد سے مظلومہ کے جان کے درپے ہو گیا۔ مقدمہ درج ہونے کے باوجود پولیس نے گرفتار نہ کیا۔ مکروہ فعل انجام دینے والے ملزم کی مظلومہ اور اس کے خاندان کو تیزاب ڈال کر جلا دینے کی دھمکیاں۔ مظلومہ کی دادرسی کے لئے وزیراعلیٰ پنجاب سے اپیل۔ تفصیل کے مطابق خیرپور ڈاہا کی بستی امین نگر کی رہائشی کنواری دوشیزہ شاہینہ بی بی نے پولیس کو بتایا کہ الزام علیہ محمد طارق ولد غلام قادر جو کہ ان کا رشتہ دار ہے نے تین ماہ قبل گھر میں اکیلا دیکھ کر زبردستی اسے زیادتی کا نشانہ بنایا۔ جس سے وہ حاملہ ہو گئی۔ ملمم نے اسے اسقاط حمل کی گولیاں دیں۔ جس سے حمل ضائع ہو گیا۔ میری حالت خراب ہونے پر گھر والوں کو وقوعہ کے بارے میں بتایا۔ جنہوں نے پولیس تھانہ دھوڑ کوٹ میں مقدمہ نمبر 82/17 درج کرایا۔ ملزم نے پولیس سے ساز باز کر کے عبوری ضمانت کرا لی۔ جو کہ عدالت نے ضمانت ضبط کرتے ہوئے ملزم کی فوری گرفتاری کا حکم دیا لیکن تفتیشی افسر عبدالغفار اے ایس آئی نے ملزم کو گرفتار کرنے کے بجائے معاملہ پنچایت کے ذریعے حل کرنے کا مشورہ دیا۔ اس دوران ملزم نے مختلف ذرائع سے مظلوم لڑکی اس کے خاندان والوں کو مقدمہ سے دستبرداری کے لئے ڈرانا دھمکانا شروع کر دیا۔ ملزم نے اب ہائیکورٹ بہاولپور بنچ سے عبوری ضمانت کرا رکھی ہے۔ متاثرہ لڑکی کے والد نے بتایا کہ ملزم محمد طارق اب ہمیں پورے خاندان کو تیزاب سے جلا ڈالنے کی دھمکیاں دے رہا ہے۔ انہوں نے وزیراعلیٰ پنجاب سے ملزم کو کیفر کردار تک پہنچانے کیلئے اقدامات کرنے کی اپیل کی ہے۔