دیر بالا، اپر دیر (صباح نیوز، مانیٹرنگ ڈیسک) چیئرمین تحریک انصاف عمران خان نے کہا ہے کہ ملک میں وی آئی پی احتساب ہوتا ہے اور ملک کے سب سے بڑے ڈاکو زرداری اور نوازشریف ہیں غریب اور بڑے شخص کے لیے ایک قانون ہونا چاہیے، آج ہماری سب سے بڑی تباہی کا سبب یہی کہ صرف چھوٹا چور جیلوں میں جاتا ہے اور بڑے ڈاکوں کو پروٹوکول ملتا ہے، ملک میں وی آئی پی احتساب ہوتا ہے آج ملک کی جیلوں میں جو چور ہیں ان سب کی چوری کی قیمت لگائیں تو نوازشریف کا ایک لندن مے فیئر کے برابر ہوگا، چھوٹا چور چوری کرے تو گھر کا نقصان ہوتا ہے لیکن جب ملک میں وزیراعظم، صدر اور وزیر کرپشن کریں تو ساری قوم کا پیسہ لوٹ کر قوم کو مقروض کردیتے ہیںیہ واحد ملک اسلام کے نام پر بنا تھا، ہمیں اسے وہ ملک بنانا ہے جہاں انصاف ہو، بڑے ڈاکوﺅں کو جیلوں میں ڈالا جائے، ان کا پیسہ ملک میں لایا جائے تاکہ یہ پیسہ نوجوانوں کو روزگار دینے پر خرچ ہو۔ بینظیر گئی تو زرداری اور بلاول اوپر آگئے، بیچارے بلاول کو تو اردو بھی بولنا نہیں آتی، جس نے ایک روپیہ محنت سے نا کمایا ہو وہ ملک کی سربراہی کیسے کرسکتا ہے؟ بلاول بھٹو اور آصف زرداری میں کیا قابلیت ہے؟ سینما کے ٹکٹ بلیک کرنے والا کس طرح ملک چلا سکتا ہے؟ جو انقلاب خیبرپختونخوا سے شروع ہوا تھا وہ سارے پاکستان میں آنے والا ہے، اگلے الیکشن میں تحریک انصاف کامیاب ہوگی، جمعہ کے روز دیر میں جلسہ عام سے خطاب کرتے ہوئے چیر مین تحریک انصاف کا کہنا تھا کہ شاندار استقبال پر دیر کے لوگوں کا شکریہ اداکرتا ہوں، نیا پاکستان نوجوانوں کے لیے بنے گا، ہم اس ملک کو ایک عظیم قوم بنائیں گے، اللہ کی برکت کبھی اس قوم پر نہیں آتی جس میں ظلم اور ناانصافی ہوتی ہے، جس قوم میں عدل اور انصاف کا نظام ہوتا ہے وہاں اللہ کی برکت آتی ہے۔ ان کا کہنا تھا کہ ہماری سب سے بڑی تباہی کا سبب یہ ہے کہ چھوٹا چور جیل میں جاتاہے اور بڑے ڈاکو کو 40 گاڑیوں کا پروٹوکول ملتا ہے اور اس کا وی آئی پی احتساب ہوتا ہے،پاکستان کے جیلوں میں جو چور ہیں ان کی ساری چوری کی قیمت لگالو تو نواز شریف کے ایک لندن کے محل کے برابر بنے گی۔عمران خان کا کہنا تھا کہ چھوٹے چوروں سے ملک کو نہیں صرف ایک گھر کونقصان ہوتاہے،وزیراعظم اور وزیر چوری کرکے پوری قوم کو غریب کردیتے ہیں، زرداری اورنوازشریف نے قوم کاپیسہ چوری کیا، ہرپاکستانی پر ایک لاکھ 20 ہزار روپیہ قرضہ چڑھ چکاہے، یہ ڈاکا مار کرملک سے پیسہ باہر لےگئے، منی لانڈرنگ سے قوم کو دگنا نقصان ہوتا ہے جب کہ قرضے کی قسط واپس کرنے کے لیے عوام پر ٹیکس لگایا جاتا ہے، موبائل فون پر ایک سو روپے میں 35 روپے ٹیکس لگتاہے، لوٹتا کوئی ہے اور پیسے قوم ادا کرتی ہے۔ چیئرمین تحریک انصاف عمران خان کا کہنا تھا کہ ہمارے سرکاری سکولوں کانظام تباہ کیاگیا، پیسے والے بچوں کے لیے انگلش میڈیم اورغریبوں کے لیے اردو میڈیم سکول ہے جب کہ خیبرپختونخوا میں ایک لاکھ بچہ پرائیویٹ سکولوں سے سرکاری سکولوں میں گیاہے۔ انہوں نے کہا کہ پاک چین راہداری منصوبے کی کامیاب تکمیل کے لیے دعاگو ہوں، یہ منصوبہ دونوں ممالک کے عوام پر مثبت اثرات مرتب کرے گا، ملک سے غربت مٹانے کے لیے چین کی کاوشیں متاثر کن ہیں۔ بلاول بھٹو اور آصف زرداری کو تنقید کا نشانہ بناتے ہوئے عمران خان کا کہنا تھا کہ بےنظیر بھٹو اور آصف زرداری کے بعد بلاول بھٹو کو لاونچ کیا گیا، بلاول کو تو اردو بھی بولنی نہیں آتی جب کہ جس بچے نے زندگی میں ایک دن کی نوکری نہ کی ہو وہ کیسے ملک کی سربراہی کرسکتا ہے، دوسری طرف آصف زرداری بمبینو سینما کا ٹکٹ بلیک کیا کرتا تھا وہ ملک کیسے چلا سکتا ہے۔ انہوں نے کہا منی لانڈرنگ سے ملک کو دگنا نقصان ہوتا ہے حکمرانوں کی لوٹ مار کی قیمت عوام کو ادا کرنا پڑتی ہے۔ عمران خان نے مطالبہ کیا کہ بڑے ڈاکوﺅں کو جیلوں میں ڈال کر باہر سے پیسہ واپس لایا جائے، لوٹا گیا پیسہ ہسپتالوں اور بچوں کی تعلیم پر خرچ ہونا چاہیے۔
