چیمپئنز ٹرافی ، بیلجیئم نے پاکستان ہرا کر پانچویں پوزیشن حاصل کر لی

ایمسٹرڈیم (اے پی پی) ایف آئی ایچ چیمپئنز ٹرافی ہاکی ٹورنامنٹ میں بیلجیئم نے پاکستان کو کانٹے دار مقابلے کے بعد پنالٹی اسٹروکس پر 2-1 گولز سے شکست دے کر پانچویں پوزیشن حاصل کر لی، مقررہ وقت تک دونوں ٹیموں کے درمیان مقابلہ 2-2 گولز سے برابر تھا تاہم پنالٹی اسٹروکس پر بیلجیئم نے گرین شرٹس کو 2-1 گولز سے ہرا کر کامیابی حاصل کی، پاکستانی کھلاڑیوں نے چار پنالٹی اسٹروکس ضائع کئے۔ اتوار کو چیمپئنز ٹرافی میں پانچویں پوزیشن کیلئے کھیلے گئے میچ میں پاکستان اور بیلجیئم کے درمیان زبردست مقابلہ دیکھنے کو آیا تاہم اعصاب کی جنگ میں قسمت نے بیلجیئم کا ساتھ دیا اور اس نے پاکستان کو پنالٹی اسٹروکس پر 2-1 گولز سے ہرا کر پانچویں پوزیشن حاصل کی، میچ کے 16ویں منٹس میں پاکستان کے شان علی نے شاندار فیلڈ گول کر کے ٹیم کو برتری دلائی، 27ویں منٹس میں بیلجیئم کے بون ٹام نے پنالٹی اسٹروک پر گول کر کے مقابلہ 1-1 سے برابر کر دیا، پہلے ہاف میں دونوں ٹیموں کے درمیان مقابلہ 1-1 گول سے برابر رہا، دوسرے ہاف کے چوتھے ہی منٹس میں بیلجیئم کے وان فلورینٹ نے فیلڈ گول کر کے ٹیم کو 2-1 گولز کی برتری دلا دی، میچ کے آخری منٹ میں پاکستان کے ارشد توثیق نے پنالٹی کارنر پر گول کر کے مقابلہ 2-2 گولز سے برابر کر دیا، اسطرح مقررہ وقت تک دونوں ٹیموں کے درمیان مقابلہ 2-2 گولز سے برابر رہا، میچ کو فیصلہ کن بنانے کیلئے دونوں ٹیموں کو پانچ، پانچ پنالٹی اسٹروکس ملے، بیلجیئم نے 2 جبکہ پاکستانی ٹیم صرف ایک گول کر سکی۔، گرین شرٹس کی جانب سے ارشد توثیق، محمد عمر بھٹہ، شان علی اور شفقت رسول نے پنالٹی ضائع کئے، اسطرح بیلجیئم نے گرین شرٹس کو پنالٹی اسٹروکس پر 2-1 گولز سے زیر کر کے پانچویں پوزیشن حاصل کی۔