یوروگوئے کے ارمان چکنا چور ، فرانس سیمی فائنل میں

ماسکو(نیوزایجنسیاں) فٹ بال ورلڈ کپ 2018 کے پہلے کوارٹر فائنل میں فرانس نے یوروگوائے کو 0-2 سے شکست دے کر سیمی فائنل کے لیے کوالیفائی کرلیا۔نزنی نوگروڈ اسٹیڈیم میں کھیلے گئے میچ میں مجموعی طور پر فرانس کا غلبہ رہا جس کا اندازہ 62 فیصد بال پوزیشن سے ہوتا ہے۔یوروگوائے نے فرانسیسی گول پر چار حملے کیے تاہم گول کیپر انہیں روکنے میں کامیاب رہا۔اس کے مقابلے میں فرانس نے صرف دو مرتبہ گول پر حملے کیے تاہم دونوں مرتبہ گول اسکور کرنے میں کامیاب رہا۔پہلا گول رافیل ورانے نے 40ویں منٹ میں اسکور کیا۔ 61ویں منٹ میں انٹون گرزمان کے گول کی بدولت فرانس کی سبقت دگنی ہوگئی۔کھیل کے40 ویں منٹ میں فرانس کو فری کک ملی، گرزمین کی کک پر رافائل ورانے نے ہیڈر کے ذریعے بال کو جال میں پھینکتے ہوئے ٹیم کو برتری دلائی۔61 ویں منٹ میں گرزمین کی لانگ رینج سے لگائی گئی کک کو یوراگوین گول کیپر سمجھنے میں ناکام رہے اور ان کی اس بڑی غلطی کے نتیجہ میں بال ان کے گلوز کے ساتھ ٹکراتا ہوا نیٹ میں چلا گیا اور فرانس کی برتری 0-2 ہو گئی، یوراگوین ٹیم مجموعی طور پر اچھا کھیل پیش نہ کر پائی، اپنے پارٹنر ایڈیسن کاوانی کی انجری کے باعث سواریز بھی رنگ جمانے میں ناکام رہے۔واضح رہے کہ میگا ایونٹ کا پہلا سیمی فائنل میچ 10 جولائی کو جبکہ دوسرا سیمی فائنل میچ 11 جولائی کو کھیلا جائیگا۔ ٹورنامنٹ میں تیسری پوزیشن کے لئے میچ 14 جولائی کو کھیلا جائیگا اور چیمپئن کا فیصلہ 15 جولائی کو کھیلا جائیگا۔