ماسکو (اے پی پی) اکیسواں ورلڈ کپ فٹ بال ٹورنامنٹ اختتامی مراحل کی طرف گامزن ہے، اکیسویں ورلڈ کپ فٹ بال ٹورنامنٹ کے آخری دو کوارٹر فائنلز (آج) ہفتہ کو کھیلے جائینگے، اس سلسلے میں میگا ایونٹ کا تیسرا کوارٹر فائنل میچ میں انگلینڈ کا مقابلہ سویڈن کی ٹیم سے ہوگا جو پاکستان کے معیاری وقت کے مطابق شام سات بجے شروع ہوگا جبکہ چوتھا اور آخری کوارٹر فائنل میچ میں میزبان روس کو کروشیا کا چیلنج درپیش ہوگا، یہ میچ پاکستان کے معیاری وقت کے مطابق رات گیارہ بجے شروع ہوگا۔ تفصیلات کے مطانق روس میں رواں میگا ایونٹ میں ٹیموں کے درمیان عالمی ٹائٹل کیلئے زبردست جنگ جاری ہے، دفاعی چیمپئن جرمنی کے بعد لائنل میسی کی ارجنٹائن اور کرسٹیانو رونالڈو کی پرتگال ، سپین، ایشیائی ٹیم جاپان اور میکسیکو کی ٹیمیں بھی ٹائٹل کی دوڑ سے باہر ہو چکی ہیں ۔ واضح رہے کہ میگا ایونٹ کا تیسرا کوارٹر فائنل میچ انگلینڈ اور سویڈن کی ٹیموں کے درمیان کھیلا جائیگا جبکہ دوسرے میچ میں روس اور کروشیا کی ٹیمیں آمنے سامنے ہونگی۔ واضح رہے کہ میگا ایونٹ کا پہلا سیمی فائنل میچ 10 جولائی کو جبکہ دوسرا سیمی فائنل میچ 11 جولائی کو کھیلا جائیگا۔ ٹورنامنٹ میں تیسری پوزیشن کے لئے میچ 14 جولائی کو کھیلا جائیگا اور چیمپئن کا فیصلہ 15 جولائی کو کھیلا جائیگا۔
