ہرارے (اے پی پی) گلین میکسویل اور ٹراویز ہیڈ کی شاندار بیٹنگ کی بدولت آسٹریلیا نے سخت مقابلے کے بعد سہ فریقی ٹی ٹونٹی انٹرنیشنل کرکٹ سیریز کے چھٹے میچ میں میزبان زمبابوے کو 5 وکٹوں سے ہرا دیا۔ گلین میکسویل نے عمدہ بیٹنگ کا مظاہرہ کرتے ہوئے 56 رنز بنائے اور ٹراویز ہیڈ نے 48 رنز بنائے، اینڈریو ٹائے نے عمدہ باﺅلنگ کا مظاہرہ کرتے ہوئے تین شکار کئے اور میچ کے بہترین کھلاڑی قرار پائے، آسٹریلوی باﺅلرز کی عمدہ باﺅلنگ کی بدولت میزبان ٹیم کے پانچ کھلاڑی دوہرا ہندسہ بھی عبور نہ کر سکے اور میزبان ٹیم نے مقررہ 20 اوورز میں 9 وکٹوں کے نقصان پر 151 رنز بناکر کینگروز کو میچ میں کامیابی کے لئے 152 رنز ہدف دیا جو آسٹریلوی ٹیم نے 19.5اوورز میں 5 وکٹوں کے نقصان پر حاصل کرلیا۔ سہ فریقی ٹی ٹونٹی انٹرنیشنل کرکٹ سیریز کا فائنل پاکستان اور آسٹریلیا کی ٹیموں کے درمیان کھیلا جائیگا۔ جمعہ کو کھیلے گئے سہ فریقی سیریز کے چھٹے میچ میں زمبابوے کی ٹیم نے پہلے کھیلتے ہوئے مقررہ اوورز میں 9 وکٹوں کے نقصان پر 151 رنز بناکر کینگروز کو میچ میں کامیابی کے لئے 152 رنز کا مجموعہ ترتیب دیا، سولومون 63، پیٹر مور نے 30 رنز بنائے۔ سولومون کے علاوہ کوئی بھی کھلاڑی وکٹ پر نہ ٹھہر سکا، سولومون نے اپنی انفرادی 63 رنز اننگز کے دوران 52 گیندوں کا سامنا کرتے ہوئے 2 چھکوں اور 5 چوکوں کی مدد سے 63 رنز بنائے۔ انہیں 63 کے انفرادی سکور پر اینڈریو ٹائے نے کلین بولڈ کیا۔ آسٹریلیا کی طرف سے اینڈریو ٹائے نے تین کھلاڑیوں کو آﺅٹ کیا، رچرڈ سن اور سٹانلیک نے دو،دو جبکہ وائلڈرموتھ نے ایک وکٹ لی، جواب میں گلین میکسویل اور ہیڈ کی عمدہ بیٹنگ کی بدولت آسٹریلیا کی ٹیم نے مطلوبہ ہدف 5 وکٹوں کے نقصان پر حاصل کرلیا۔ گلین میکسویل نے 56 رنز بنائے جس میں انکے 5 چھکے اور ایک چوکا شامل ہے۔ ٹراویز ٹائے نے 48 رنز بنائے۔ سٹونیس 12 اور ایگر 5 رنز کے ساتھ ناٹ آﺅٹ رہے۔ یوں آسٹریلیا نے انتہائی سخت مقابلے کے بعد زمبابوے کو 5 وکٹوں سے ہرا دیا۔ زمبابوے کی طرف سے بلیسنگ موزارابانی نے عمدہ باﺅلنگ کا مظاہرہ کرتے ہوئے تین اور ماساکدزا اور ٹیریپانو نے ایک ایک کھلاڑی کو آﺅٹ کیا۔ آسٹریلیا کے مایہ ناز آل راﺅنڈر گلین میکسویل عمدہ بیٹنگ کا مظاہرہ کرنے پر میچ کے بہترین کھلاڑی قرار دیا گیا۔
