ماسکو(اے پی پی) اکیسویں ورلڈ کپ فٹ بال ٹورنامنٹ کی سیمی فائنل لائن اپ مکمل ہو گئی، فرانس، انگلینڈ، بیلجیئم اور کروشیا نے لاسٹ فور میں جگہ بنا رکھی ہے، سیمی فائنل مرحلے کا آغاز (کل) منگل کو فرانس اور بیلجیئم کے خلاف پہلے سیمی فائنل سے ہو گا۔ تفصیلات کے مطابق روس میں جاری میگا ایونٹ اختتامی مراحل کی طرف گامزن ہے اور چار ٹاپ ٹیموں فرانس، انگلینڈ، بیلجیئم اور کروشیا نے شاندار کھیل کی بدولت سیمی فائنل میں جگہ بنا رکھی ہے، ایونٹ کے کوارٹر فائنلز میں فرانس نے یوروگوئے، انگلینڈ نے سویڈن، بیلجیئم نے فیورٹ برازیل اور کروشیا نے میزبان روس کو شکست فاش سے دوچار کیا تھا۔ ایونٹ کا سیمی فائنل مرحلہ کل منگل سے شروع ہو گا، پہلے سیمی فائنل میں فرانس کو بیلجیئم کا چیلنج درپیش ہو گا جبکہ دوسرا سیمی فائنل 11 جولائی کو کروشیا اور انگلینڈ کے درمیان کھیلا جائے گا۔ واضح رہے کہ دو ٹاپ ٹیموں کے درمیان فائنل 15 جولائی کو کھیلا جائے گا۔ورلڈ کپ کے آخری کوارٹر فائنل میں کروشیا کی ٹیم نے میزبان روس کو شکست دے کر 20سال بعد ورلڈ کپ کے سیمی فائنل کے لیے کوالیفائی کر لیا۔ میچ میں روس کی ٹیم نے میچ کے 31ویں منٹ میں گول کر کے برتری حاصل کی لیکن 8منٹ بعد ہی آندرے کرامیرچ نے کروشیا کے لیے گول اسکور کر کے مقابلہ برابر کردیا۔پہلے ہاف کے اختتام تک دونوں ٹیموں کے درمیان مقابلہ 1-1 گول سے برابر رہا۔میچ کے دوسرے ہاف میں دونوں ٹیموں کے درمیان گول کرنے کی تگ و دو جاری رہی لیکن دونوں ٹیمیں ملنے والے مواقعوں سے فائدہ نہ اٹھا سکیں اور انتہائی کوشش کے باوجود کوئی بھی ٹیم گول اسکور نہ کر سکی۔مقررہ وقت میں مقابلہ رہنے کے بعد 30 منٹ کے اضافی وقت میں میچ کو نتیجہ خیز بنانے کا فیصلہ کیا گیا۔ایکسٹرا ٹائم کے 15منٹ پر مشتمل پہلے ہاف میں کروشیا کی ٹیم گول اسکور کرنے میں کامیاب رہی اور میچ کے 100ویں منٹ میں ڈوماگو ویدا نے گول کر کے اپنی ٹیم کو اہم کامیابی دلائی۔ایکسٹرا ٹائم کے پہلے ہاف میں کروشیا کو برتری حاصل تھی اور دوسرے ہاف میں بھی کروشیا کی ٹیم میزبان ملک کے خلاف فتح کی جانب گامزن نظر آتی تھی لیکن کھیل کے اختتام سے 5منٹ قبل ماریو فرنینڈس نے گول کر کے مقابلہ برابر کردیا۔اضافی وقت میں بھی مقابلہ برابر رہنے پر میچ کا فیصلہ پینالٹی ککس پر کرنے کا فیصلہ کیا گیا۔پینالٹی ککس پر روس کا آغاز کچھ اچھا نہ تھا اور پہلی پینالٹی کو کروشیا کے گول کیپر نے روک لیا جبکہ مارسیلو بروزووچ نے گول کر کے کروشیا کو برتری دلا دی۔ایلن زیگیوو نے روس کے لیے دوسری پینالٹی پر گول کیا لیکن کروشیا کے ماٹیو کوواچچ گول کرنے میں ناکام رہے اور مقابلہ 1-1 سے برابر ہو گیا
فرانس اوربیلجیم کل پہلے سیمی فائنل میں مدمقابل ہونگے
