پریانکا چوپڑا کی امریکی گلوکار نک جونس سے منگنی

ممبئی(ویب ڈیسک) بالی وڈ اداکارہ پریانکا چوپڑا نے امریکی گلوکار نک جونس سے منگنی کرلی۔میڈیا رپورٹس کے مطابق پریانکا اور نک جونس کی منگنی کی رسم ممبئی میں ان کے گھر میں ادا کی گئی۔اس موقع پر اداکارہ کے قریبی عزیز و اقارب سمیت نک جونس کے والدین بھی موجود تھے، جنہوں نے جوڑے کے لیے نیک تمناﺅں کا اظہار کیا۔منگنی کے موقع پر پریانکا چوپڑا نے پیلے رنگ کا لباس زیب تن کیا جب کہ ان کے منگیتر روایتی سفید کرتے پاجامے میں دکھائی دیئے۔دونوں کی منگنی پنجابی رسم و رواج کے مطابق ہوئی، جبکہ نک جونس کے والدین نے بھی بھارتی پنجابی اسٹائل میں شرکت کی۔ میڈیا کے مطابق پریانکا کی جانب سے 200 مہمانوں کی ہوٹل میں بکنگ کروائی گئی ہے جو خاص طور پر امریکا سے منگنی میں شرکت کرنے کے لیے آئے ہیں۔منگنی میں پریانکا کی کزن و اداکارہ پرینیتی چوپڑا نے بھی پیلے رنگ کا لباس زیب تن کیا، انہوں نے خصوصی طور پر لکھنو سے فلم کی شوٹنگ منسوخ کرکے شرکت کی۔رپورٹس کے مطابق آج رات منگنی کی تقریب کا بھی اہتمام کیا گیا ہے، جس میں بالی وڈ اسٹارز سمیت شوبز شخصیات شرکت کریں گے۔اس تقریب کا اہتمام خاص طور پر نک جونس کو پریانکا کے دوستوں اور کولیگز سے ملوانے کے لیے کیا گیا ہے۔منگنی کی تقریب میں رنویر سنگھ، کرن جوہر، منیش ملہوترا، روینا ٹنڈن اور دیگر بھارتی اسٹارز کی شرکت متوقع ہے۔