ممبئی (ویب ڈیسک)رشی کپور کا شمار بالی وڈ کے صف اول کے اداکاروں میں ہوتا ہے جو کہ کئی دہائیوں سے فلم نگری میں راج کررہے ہیں۔لیجنڈ اداکار اس وقت بھی کئی فلموں میں اہم کرداروں میں نظر آتے ہیں جس میں حال ہی میں ریلیز ہونے والی فلم ’ملک‘ بھی شامل ہے۔رشی کپور اداکاری کے ساتھ ساتھ سوشل میڈیا پر بھی فعال رہتے ہیں اور اپنے بیانات اور ٹوئٹس کی وجہ سے تنازعات میں گھرے رہتے ہیں۔بھارتی ویب سائٹ کو دیئے گئے حالیہ انٹرویو میں رشی کپور نے کھل کر اظہار خیال کیا ہے۔ ان کا کہنا تھا کہ دنیا بھر میں دشمن ممالک ایک دوسرے سے گلے مل رہے ہیں جس کی مثال دیوار برلن گرانا، جنوبی کوریا اور شمالی کوریا کا اختلافات کو بھلانا شامل ہے لیکن کیا ہم 71 سالوں بعد پاکستان کے ساتھ ایسا کچھ کرسکتے ہیں؟انہوں نے کہا کہ ہم ابھی بھی کشمیر اور مذاہب پر لڑ رہے ہیں جو کہ بچگانہ عمل ہے ، اس وقت جب ساری دنیا پرانے مسائل سے جان چھڑا رہی ہے، ہم کشمیر کے پیچھے پڑے ہوئے ہیں لیکن اب اس معاملے کو کسی بھی طرح سے حل کرنا پڑے گا۔رشی کپور نے مزید کہا کہ میرے والدین کی پیدائش برٹش انڈیا میں ہوئی تھی اور اس وقت پاکستان نہیں بنا تھا اور میرے دادا 1926 میں پشاور سے ممبئی آئے تھے لہٰذا مجھے پشاور والا ہونے پر فخر ہے لیکن میں اپنے آباءو اجداد کی جگہ نہیں دیکھ سکتا اور پاکستان نہیں جاسکتا۔انہوں نے کہا کہ میری 2 نسلیں گزرچکی ہیں لہٰذا میرے لیے افسوس کی بات ہے کہ آزادی کے 71 سال بعد بھی وہی پریشانیاں ستا رہی ہیں۔رشی کپور کا کہنا تھا کہ وہ کافی عرصے سے دونوں ممالک کے درمیان امن کی امید لگائے بیٹھے ہیں،کئی حکومتیں آئیں اور چلی گئیں لیکن مسائل وہیں کے وہیں اٹکے ہوئے ہیں۔انہوں نے کہا کہ جب دونوں ملکوں کے لوگ آپس میں ملتے ہیں تو ایسے ملتے ہیں جیسے بچھڑے ہوئے خاندان کے لوگ ملتے ہیں کیوں کہ رہن سہن، طور طریقے اور کھانے سب ایک جیسے ہیں۔رشی کپور نے کہا کہ 1990 میں فلم ’حنا‘ کی ایک روز کی شوٹنگ ہم نے اسلام آباد میں کی تھی جس کے لیے 4 یا 5 روز قیام کیا تھا لیکن اس دوران میری اس طرح آﺅ بھگت کی گئی جیسے میں ’ہندوستان کا بادشاہ‘ ہوں۔ایک اور سوال کے جواب میں ان کا کہنا تھا کہ میں نے اپنے والد اور آباءو اجداد کا پشاور میں گھر دیکھا ہے، اس سال میں 66 برس کا ہوجاو¿ں گا لیکن آج اپنے بچوں کو ان کے دادا کا گھر دکھانے نہیں لے جا سکتا۔اپنے بیٹے رنبیر کپور سے متعلق سوال پر ان کا کہنا تھا کہ رنبیر نے فلم ’سنجو‘ میں بہترین اداکاری کرکے ناقدین کے منہ بند کردیئے ہیں۔ جہاں اس نے ’سنجو‘ کے لیے خود کو بہترین کہلوایا ہے تو وہیں اس نے فلم ’جگا جاسوس‘ کرکے خود کو بدترین اداکار کہلوانے کا حق دار بھی ٹھہرایا ہے۔یاد رہے کہ بھارتی اداکار رشی کپور 1990 میں فلم ’حنا‘ کی شوٹنگ کے لیے پاکستان آئے تھے اور اس موقع پر انہیں پاکستان میں بے انتہا محبت ملی تھی اور ان کی خوب آﺅ بھگت کی گئی تھی۔
بالی وڈ اداکار رشی کپور کو پاکستان میں کی گئی آﺅ بھگت یاد آنے لگی
