پریانکا نے ’بھارت‘ میں کام کیلئے میری بہن کو ہزار بار فون کیا، سلمان خان

ممبئی (ویب ڈیسک)بالی وڈ اداکار سلمان خان کا کہنا ہے کہ پریانکا چوپڑا نے فلم ’بھارت‘ میں کام کے لیے میری چھوٹی بہن ارپتا خان کو ایک ہزار مرتبہ فون کیا۔گزشتہ دنوں پریانکا چوپڑا نے سلمان خان کے مدمقابل فلم ’بھارت‘ میں کام سے انکار کیا تھا اور فلم کی شوٹنگ سے چند دن قبل ہی کاسٹ سے علیحدہ ہوگئیں تھیں۔سلمان خان بھی پریانکا کی جانب سے اچانک فلم چھوڑنے پر ناراضی ظاہر کی تھی اور اپنے کئی انٹرویوز میں انہوں نے دبے الفاظ میں غصے کا اظہاربھی کیا تھا۔سلو میاں نے اب اپنے ایک انٹرویو میں پریانکا کے فلم چھوڑنے پر کھل کر بات کی ہے اور سارے رازوں سے پردہ کشائی کی ہے۔انہوں نے کہا کہ پریانکا نے بتایا کہ وہ شادی کررہی ہیں جس کے باعث فلم چھوڑ رہی ہیں لیکن میں نے ان سے کہا کہ شادی کے لیے فلم چھوڑنے کی کیا ضرورت ہے؟ شادی کرلو اور جتنے دن کام نہیں کروگی ہم کسی نہ کسی طرح معاملات کو دیکھ لیں گے۔ان کا کہنا تھا کہ فلم میں پریانکا کو 75 سے 80 دن کام کرنا تھا جس کے لیے ہم چھٹی دینے کو بھی تیار تھے لیکن پریانکا نے صاف لفظوں میں کام سے انکار کیا۔ایک سوال کے جواب میں سلمان خان کا کہنا تھا کہ پریانکا نے فلم سائن کرنے سے پہلے ایک ہزار مرتبہ میری چھوٹی بہن ارپتا خان کو فون کرکے کہا کہ میں سلمان کے ساتھ کام کرنا چاہتی ہوں جب کہ پریانکا نے فلم کے ہدایت کار علی عباس ظفر کو بھی فون کیے کہ فلم میں میرے لیے کوئی کردار ہو تو کاسٹ کیا جائے۔سلو میاں نے کہا کہ مجھے نہیں معلوم کہ اجازت کے باوجود پریانکا نے فلم کیوں چھوڑی ہے لیکن میرے نزدیک اس کی 2 وجوہات ہوسکتی ہیں کہ انہیں شادی کرنی ہے یا میرے ساتھ کام ہی نہیں کرنا ہے۔انہوں نے مزید کہا کہ پریانکا کے فلم میں کام سے انکار کی وجہ یہ بھی ہوسکتی ہے کہ وہ اب بالی وڈ میں کام کرنا نہ چاہتی ہوں اور صرف ہالی وڈ میں ہی کام کی خواہش مند ہوں۔یاد رہے کہ پریانکا چوپڑا نے سلمان خان کی فلم ’بھارت‘ کو خیرباد کہنے کے بعد امریکی گلوکار نک جونس سے منگنی کی ہے اور جلد ہی ان کی شادی متوقع ہے۔