پاک پروٹیزٹیسٹ سیریزکامیدان کل سے سجے گا

سینچورین(آئی این پی) پاکستان اور جنوبی افریقہ کے مابین 3ٹیسٹ میچوں کی سیریز کا پہلا ٹیسٹ (کل)بدھ سے سینچورین میں شروع ہوگا۔ سپراسپورٹس پارک اسٹیڈیم سینچورینکی وکٹ پاکستانی بلے بازوں کے امتحان کیلئے تیار ہے۔ سنچورین میں جنوبی افریقا کے خلاف پہلے ٹیسٹ کیلئے پچ پر گھاس موجود ہے امکان ہے کہ پچ فاسٹ بولروں کو مدد دے گی اس لئے اصل امتحان پاکستانی بیٹنگ کا ہوگا۔پاکستانی بیٹنگ میں امام الحق، فخر زمان، اظہر علی، حارث سہیل، اسد شفیق، بابراعظم اور کپتان سرفراز احمد شامل ہوں گے جب کہ ان فارم شان مسعود کی جگہ امام الحق کے ساتھ فخر زمان اننگز کا آغاز کریں گے۔پاکستانی ٹیم پہلے ٹیسٹ میں چھ بیٹسمینوں، تین فاسٹ بولروں محمد عامر، حسن علی اور شاہین شاہ آفریدی اور ایک اسپیشلسٹ اسپنر یاسر شاہ کے ساتھ میدان میں اترے گی۔محمد عباس کے حوالے سے چیف سلیکٹر انضمام الحق کا دعوی درست ثابت نہ ہوسکا اور وہ بدستور کندھے کی تکلیف میں مبتلا ہیں جس کے باعث پہلے ٹیسٹ میں شرکت نہیں کرسکیں گے۔دو روز قبل چیف سلیکٹر انضمام الحق نے میڈیا کو بتایا تھا کہ محمد عباس کو ڈاکٹرز نے کہا تھا کہ پریکٹس میچ میں 50 فیصد جب کہ ٹیسٹ میچ میں 100 فیصد فٹ ہوجائیں گے اس لئے آرام دیا گیا تھا۔انضمام الحق نے کہا تھا کہ پاکستانی ٹیم کو نیوزی لینڈ کیخلاف سیریز 0-3 سے جیتنی چاہیے تھی لیکن بیٹسمینوں نے اچھا پرفارم نہیں کیا، کھلاڑیوں کو احساس ہوا کہ غلطیاں ہوئیں جو جنوبی افریقا سیریز میں نہیں دہرائیں گے۔انضمام الحق کے بھتیجے امام الحق کی بیٹنگ فارم یقینی طور پر سب کی نظروں میں ہے اور وہ نیوزی لینڈ کی سیریز میں تین ٹیسٹ میں صرف 73 رنز بناسکے تھے۔