میلبورن (اے پی پی) آسٹریلوی ٹیم کے قائد اور وکٹ کیپر بلے باز ٹم پین کو بھی بالاآخر سٹیون سمتھ اور ڈیوڈ وارنر کی یاد ستانے لگی، انہوں نے بیٹنگ کے خلا کو پر کرنے کیلئے دونوں بلے بازوں کی ٹیم میں واپسی کو ناگزیر قرار دے دیا، ناقص بیٹنگ بھارت کے ہاتھوں تیسرے ٹیسٹ میں شکست کا سبب بنی، آخری میچ جیت کر سیریز برابر کرنے کیلئے بھرپور تیاری کے ساتھ میدان میں اتریں گے۔ سمتھ اور وارنر کو رواں سال دورہ جنوبی افریقہ کے دوران بال ٹیمرنگ اسکینڈل میں ملوث ہونے پر کرکٹ آسٹریلیا کی جانب سے ایک سال کی معطلی کا سامنا ہے، دونوں کھلاڑیوں کی غیرموجودگی کی وجہ سے آسٹریلوی ٹیم کو مشکلات کا سامنا ہے۔ بھارت کے ہاتھوں تیسرے ٹیسٹ میں شکست کے بعد پریس کانفرنس کرتے ہوئے آسٹریلوی قائد نے کہا کہ سمتھ اور وارنر ورلڈ کلاس بلے باز ہیں، دونوں بلے بازوں کی عدم دستیابی کی وجہ سے ٹیم میں بڑا خلا پیدا ہوا ہے، میں سمجھتا ہوں کہ دونوں بلے بازوں کی واپسی تک بیٹنگ مسائل کو حل کرنا مشکل ہی نہیں نا ممکن ہے اور اس وقت پوری ٹیم دونوں کھلاڑیوں کو ٹیم میں واپس دیکھنے کیلئے بے تاب ہے۔ ان کا کہنا ہے کہ ناقص بیٹنگ تیسرے ٹیسٹ میں شکست کی وجہ بنی، اب تمام تر توجہ آخری ٹیسٹ پر مرکوز ہے، میچ جیت کر سیریز برابر کرنے کیلئے سرتوڑ کوشش کریں گے اور مقصد کے حصول کیلئے ہر کھلاڑی کو اپنی ذمہ داری احسن طریقے سے نبھانا ہو گی۔
