لاہور (مدثر نواب) سپریم کورٹ کے موجودہ ججز میں سے 8 ججز 65 سال کی عمر پوری ہونے کے باعث چیف جسٹس آف پاکستان کے منصب پر فائز ہونے سے پہلے ہی بطور جج ریٹائرڈ ہو جائیں گے جبکہ 8 ججز چیف جسٹس کا منصب سنبھال کرریٹائرڈ ہوں گے۔2019سے2030 تک چیف جسٹس کامنصب سنبھالنے والے ججز میں4 کاتعلق پنجاب، 2 کا سندھ اور ایک ایک فاضل جج کاتعلق خیبرپی کے اوربلوچستان سے ہے، چیف جسٹس میاں ثاقب نثارکی ریٹائرمنٹ کے بعد18 جنوری2019 کو ڈیرہ غازی خان کی دھرتی کا سپوت جسٹس آصف سعید خان کھوسہ چیف جسٹس کے عہدے کاحلف اٹھائیں گے اور رواں سال20 دسمبر2019 تک 11 ماہ تک اس عہدے پر فائز رہیں گے۔جسٹس کھوسہ کی ریٹائرمنٹ کے بعد جسٹس گلزاراحمد 21 دسمبر2019 تا یکم فروری2022 تک بطور چیف جسٹس آف پاکستان فرائض سرانجام دیں گے۔اسی طرح جسٹس عمر بندیال 2 فروری 2022 تا16ستمبر2023 ، جسٹس قاضی فائز عیسیٰ 17ستمبر 2023 تا 25 اکتوبر 2024 جبکہ جسٹس اعجاز الاحسن 10 ماہ کیلئے چیف جسٹس کے عہدے پر برجمان رہیںگے ۔اسی طرح موجودہ ججز میں سے جسٹس منصور علی شاہ جوکہ بطور چیف جسٹس لاہور ہائیکورٹ اپنے فرائض سرانجام دے چکے ہیں دوسرے جج ہوں گے جو 2 سال سے زائد مدت کیلئے عہدہ سنبھالیں گے اور ان کی ریٹائرمنٹ 27 نومبر 2027 ہوگی۔ اس کے بعد جسٹس منیب اختر ایک سال کیلئے چیف جسٹس کا عہدہ سنبھالنے کے بعد 13 دسمبر 2028 کو اپنے منصب سے ریٹائر ہو جائیں گے۔چیف جسٹس پاکستان بننے کا جن ججز کو موقع نہیں ملے گا ان میں جسٹس شیخ عظمت سعید27اگست 2019، جسٹس مشیر عالم 17اگست 2021، جسٹس مقبول باقر 4اپریل 2022، جسٹس منظور احمد ملک30اپریل 2021، جسٹس سردار طارق مسعود10مارچ 2024، جسٹس فیصل عرب 4نومبر2020، جسٹس مظہر عالم خان میاں خیل 13جولائی 2022 اور جسٹس سجاد علی شاہ 13اگست 2022کو اپنے عہدہ سے ریٹائرہو جائیں گے۔
