اسلام آباد:(ویب ڈیسک) عالمی مالیاتی فنڈ کا اعلیٰ سطح کا وفد ا?ج پاکستان پہنچے گا۔ذرائع نے ہم نیوز کو بتایا کہ وفد کی قیادت آئی ایم ایف کے ڈائریکٹر برائے مشرق وسطیٰ اور وسط ایشیائی جہاد آزور کریں گے۔وفد میں پاکستان میں فنڈ کے مشن ہیڈ ارنستو رمریز ریگو بھی شامل ہوں گے اور یہ 20 ستمبر تک قیام کرے گا۔ذرائع کے مطابق وفد کی وزیر اعظم عمران خان، مشیر خزانہ عبد الحفیظ شیخ کے علاوہ دیگر وفاقی و صوبائی حکام سے بھی ملاقاتیں متوقع ہیں۔قومی اسمبلی کی قائمہ کمیٹی برائے خزانہ کے وفد کی بھی ملاقات وفد کے شیڈول میں شامل ہے جبکہ ملاقاتوں کے دوران آئی ایم ایف کی جانب سے دئیے گئے اہداف پر عملدرآمد کا جائزہ لیا جائے گا۔ذرائع نے بتایا کہ ملاقاتوں میں مجموعی معاشی صورتحال، ٹیکس وصولیاں اور بجٹ خسارے پر بات چیت ہوگی۔ذرائع کا مزید کہنا تھا کہ سرکلر ڈیٹ، خسارے میں چلنے والے سرکاری اداروں کی نجکاری کے معاملات بھی زیربحث آئیں گے۔
