سردی کی شدت بر قرار ،پنجاب کے مختلف علاقوں میں شدیددھند ،سڑکوں پر اندھیرا ،موٹر ویز بند

اسلام آباد، لاہور، ملتان (نمائندگان خبریں) صوبہ پنجاب کے مختلف شہروں اور متعدد علاقوں کو ایک مرتبہ پھر شدید دھند نے اپنی لپیٹ میں لے لیا ہے جس کی وجہ سے حد نگاہ انتہائی کم ہو گئی ۔ موٹروے پولیس نے ڈرائیورز حضرات کو ہدایات جاری کرتے ہوئے انھیں احتیاط برتنے کا کہا ہے۔رپورٹس کے مطابق اس وقت چشتیاں، بہاولنگر اور خانیوال شہر سمیت گردونواح میں شدید دھند ہے، اس کی وجہ سے ٹریفک کی روانی متاثر ے۔ دھند کے باعث شہر میں حد نگاہ میں 20 میٹر رہ گئی ۔موٹروے پولیس ترجمان کے مطابق قومی شاہراہ پر حد نگاہ 5 میٹر ہونے کی وجہ سے نیشنل ہائی وے پر مسافر گاڑیوں کو فوگ لائٹس جلانے ہدایات کی گئی ۔ادھر موٹروے ایم تھری رجانہ سے درخانہ اور ایم فور شام کوٹ سے شور کوٹ تک دھند کی وجہ سے بند کر دی گئی ۔خانیوال سے ملتان موٹروے کو شدید دھند کی وجہ سے بند کر دیا گیا جبکہ چیچہ وطنی، میاں چنوں، خانیوال، ملتان ، لودہراں اور بستی ملوک میں بھی دھند ہے۔ قومی شاہراہ پر حد نگاہ 20 میٹر تک ہو گئی ۔ترجمان موٹروے پولیس نے ہدایات جاری کی ہیں کہ روڈ یوزرز آگے اور پیچھے دھند والی لائٹس کا استعمال کریں جبکہ غیر ضروری سفر سے گریز کیا جائے۔ تیز رفتاری سے پرہیز کریں اور اگلی گاڑی سے مناسب فاصلہ رکھیں۔روڈ یوزرز معلومات اور مدد کے لیے ہیلپ لائن 130 سے رابطہ کریں۔ موٹروے پولیس کی ہمسفر ایپ سے بھی معلومات حاصل کی جا سکتی ہیں۔ ملک بھر میں سردی کی شدت برقرار ، شمالی علاقے شدید سردی کی لپیٹ میں ، اسکردو میں درجہ حرارت منفی 18 ڈگری سینٹی گریڈ تک گر گیا ہے جب کہ استور میں درجہ حرارت منفی 12 اور گوپس میں منفی 9 ڈگری سینٹی گریڈ ریکارڈ کیا گیا۔استور میں شدید سرد موسم کے باعث ہر چیز جم جانے سے عوامی مسائل اور مشکلات میں اضافہ ہو گیا ہے۔دوسری جانب کراچی میں بھی سرد ہواں کا راج ہے جہاں کم سے کم درجہ حرارت 9 ڈگری سینٹی گریڈ ریکارڈ کیا گیا ہے۔محکمہ موسمیات کے مطابق گزشتہ 24 گھنٹوں کے دوران اسلام آباد میں ریکارڈ کیا جانے والا کم سے کم درجہ حرارت ایک ڈگری سینٹی گریڈ رہا جب کہ لاہور میں 6، پشاور میں صفر، کوئٹہ میں منفی 4، مظفر آباد میں صفر، گلگت میں منفی 6، ملتان میں 3، فیصل آباد میں 2 اور حیدر آباد میں کم سے کم درجہ حرارت 8 ڈگری سینٹی گریڈ رہا۔ملک بھر میں سردی کی شدت کے حوالے سے محکمہ موسمیات کا کہنا ہے کہ پنجاب اور بالائی سندھ کے بیشتر میدانی علاقوں جب کہ خیبر پختونخوا کے بعض اضلاع میں رات اور صبح کے اوقات میں شدید دھند چھائے رہنے کی توقع ہے۔