غربت کا مقابلہ کرنا ہمارا مشن،پسماندہ علاقوں کو ترقی دینگے،عمران خان

اسلام آباد (نامہ نگار خصوصی) وزیراعظم عمران خان نے کہا ہے کہ جب کم لوگ امیر اور زیادہ غریب ہوں تو ملک ترقی نہیں کر سکتا یہاں سب کو ترقی کے یکساں مواقع نہیں ملے۔اسلام آباد میں ڈیٹا فار پاکستان پورٹل کے اجرا کی تقریب سے خطاب کرتے ہوئے ان کا کہنا تھا کہ حکومت ملک میں غربت کے خاتمے کے لیے پرعزم ہے۔انہوں نے کہا کہ مہذب معاشرے کی پہچان غریبوں کے رہن سہن سے ہوتی ہے، پاکستان میں غربت کا مقابلہ کرنا ہمارا مشن ہے۔وزیراعظم نے کہا کہ پورے پنجاب کا بجٹ لاہور پر لگا دیا گیا، ترقیاتی فنڈزپسماندہ علاقوں میں خرچ کرنے کی ضرورت ہے۔ان کا کہنا تھا کہ بدقسمتی سے فنڈزخرچ کرتے وقت زمینی حقائق کو نہیں دیکھا جاتا، ایک علاقے پر فنڈزخرچ کرنے سے دوسرے علاقے محروم رہ جاتے ہیں۔انہوں نے کہا کہ ڈیٹا فارپاکستان کے ذریعے معلوم ہوگا کہ کہاں فنڈزخرچ کرنے ہیں، ڈی جی خان پسماندہ علاقہ ہے وہاں زیادہ پیسے خرچ ہونے چاہیئے۔ان کا مزید کہنا تھا کہ وزیراعلی پنجاب پسماندہ علاقے ڈی جی خان سے ہیں، انہوں نے جب اس علاقے پرپیسہ لگانا شروع کیا توشورمچایا گیا۔ انہوں نے کہا کہ اس مقصد کے لیے اعداد و شمار کو بہتر کرنا اہمیت کا حامل ہے، عوام پر پیسہ خرچ کرتے وقت زمینی حقائق کو مدنظر نہیں رکھا جاتا، ترقیاتی فنڈز پسماندہ علاقوں میں خرچ کرنے کی ضرورت ہے، ماضی میں پنجاب کے ترقیاتی بجٹ کا 55 فیصد بجٹ لاہور پر لگا جس کی وجہ سے دیگر شہر محروم رہے۔’ ان کا کہنا تھا کہ ‘ڈیٹا فار پاکستان اس لیے ضروری ہے کہ ہم لوگوں کو بتائیں گے کہ کہاں پیسا خرچ کرنے کی ضرورت ہے، اس ڈیٹا سے پتا چلے گا کہ بچیاں کیوں نہیں پڑھ رہیں، کیوں پیچھے رہ گئی ہیں۔’ وزیر اعظم نے کہا کہ ڈیٹا فار پاکستان کی ملک کو بہت ضرورت تھی، فیصلہ سازی اور فنڈز مختص کرنے میں یہ اعداد و شمار معاون ہوں گے۔ انہوں نے کہا کہ ان اعداد و شمار کے تحت صوبائی مالیاتی ایوارڈ میں آسانی ہوگی جبکہ کمزور طبقے کی خوشحالی سے ہی ملک ترقی کرے گا۔ ان کا کہنا تھا کہ ‘وزیر اعلی پنجاب عثمان بزدار صوبے کے پسماندہ علاقے ڈیرہ غازی خان سے تعلق رکھتے ہیں، انہوں نے اپنے ضلع میں پیسے لگانا شروع کیے تو شور مچایا گیا حالانکہ ڈی جی خان پسماندہ علاقہ ہے اور وہاں زیادہ پیسے خرچ ہونے چاہئیں۔’ واضح رہے کہ وزیر اعظم عمران خان اس سے قبل کئی بار ملک سے غربت کے خاتمے کا عزم ظاہر کر چکے ہیں اور اس سلسلے میں چین کے اقدامات کی مثال بھی دیتے آئے ہیں۔