اسلام آباد(ویب ڈیسک) وزیر خارجہ شاہ محمود قریشی کا کہنا ہے کہ چین کی طرف سے پاکستان سامان، طبی امداد اور ڈاکٹرز بھیجنے پر دوست ملک کے شکر گزار ہیں۔ وزیر خارجہ کا کہنا تھا کہ چین نے ہر مشکل وقت میں پاکستان کاساتھ دیا، دونوں ممالک ایک دوسرے کے ساتھ ہمیشہ کھڑے رہے ہیں، کوروناوائرس کو مل کرشکست دیں گے۔ ان کا کہنا تھا کہ ہیلتھ ورکرزکومحفوظ رکھنااولین ترجیح ہے، ملک میں وینٹی لیٹرزکی تعداد بڑھا رہے ہیں، چینی طبی ماہرین کی ٹیم کوروناسے متعلق ہماری رہنمائی کریگی۔ اس سے قبل چینی طیارہ امدادی سامان لے کر اسلام آباد ایئرپورٹ پہنچا، طیارے میں طبی سامان، ادویات، سرجیکل ماسک اور 217 وینٹی لیٹر شامل ہیں۔ چین کے طبی ماہرین کی 8 رکنی ٹیم بھی خصوصی طیارے پر پاکستان پہنچی، چینی طبی ماہرین کی ٹیم 2 ہفتے تک پاکستان میں قیام کرے گی۔ خیال رہے چین کی طرف سے اب تک 12 ہزار کٹس، 3 لاکھ ماسک فراہم کیے جاچکے ہیں، چین نے 10 ہزار حفاظتی لباس بھی پاکستان بھجوائے، چین نے قرنطینہ سینٹر کی تعمیر کیلئے 40 لاکھ ڈالر پاکستان کو عطیہ کیے۔
