بغداد: عراق میں وفاقی پولیس کی چیک پوسٹ پر مسلح افراد نے اندھا دھند فائرنگ کردی جس کے نتیجے میں 13 اہلکار ہلاک اور 5 زخمی ہوگئے۔
عالمی خبر رساں ادارے کے مطابق عراق کے صوبے کرکوک میں وفاقی پولیس کی چیک پوسٹ پر مسلح افراد نے دھاوا بول دیا جس پر پولیس نے بھی سخت مزاحمت کی۔
ایک گھنٹے تک جاری رہنے والی جھڑپ میں وفاقی پولیس کے 13 اہلکار ہلاک اور 5 زخمی ہوگئے۔ مزید نفری طلب کی گئی تاہم حملہ آوروں نے چیک پوسٹ کو آنے والی سڑک کو بم دھماکوں سے تباہ کردیا۔
یہ خبر پڑھیں : عراق میں امریکی فوجی اڈے پر 12 راکٹ حملے
حملہ آور جاتے ہوئے اپنے ہمراہ عراقی پولیس کا اسلحہ اور جنگی ساز و سامان لے گئے۔ تاحال کسی گروپ نے حملے کی ذمہ داری قبول نہیں کی ہے تاہم اس علاقے میں داعش متحرک اور منظم ہے۔
یہ خبر بھی پڑھیں : بغداد میں یکے بعد دیگرے 2خودکش حملوں میں 30 افراد ہلاک، 73 زخمی
واضح رہے کہ عراق میں اتحادی افواج نے داعش کو ختم کرنے کا دعویٰ کیا ہے تاہم اب بھی دوردراز علاقوں میں جنگجو موجود ہیں اور شہر میں آکر کارروائیاں کرتے ہیں۔
